Татарстанның 2012 елга бюджет проектына карата 257 тәкъдим кергән

Бүген ТР Дәүләт Советының Бюджет, салымнар һәм финанслар комитеты “2012 елга, 2013 һәм 2014 еллар планлы чорына Татарстан Республикасы бюджеты турында” закон проектын икенче укылышка әзерләде. Утырышта ТР Премьер-министры Илдар Халиков, Татарстан парламенты башлыгы урынбасары Александр Гусев, комитет рәисе Морат Гаделшин, республика министрлык-ведомстволары җитәкчеләре катнашты.
Комитет рәисе М.Гаделшин хәбәр иткәнчә, бюджет проектына 257 төзәтмә кергән. Шуның 217 се – ТР Хөкүмәтеннән (130 ы – төп тәкъдимнәр, 87 се – алар белән бәйле), калганнары - Дәүләт Советы депутатларыннан. Шунысын билгеләп үтәргә кирәк: бу юлы КПРФ фракциясе бюджет проектына илледән артык тәкъдим кертергә чакыра.
ТР Хөкүмәте төзәтмәләрен ТР Финанслар министры Радик Гайзатуллин яңгыратты. Аның сүзләренә караганда, 2012 елга федераль бюджет проекты 21 октябрьдә беренче укылышта кабул ителгән. Аның нәтиҗәсендә, федераль казнадан Татарстан Республикасы бюджетына җибәреләсе өстәмә акча күләме 664 млн. сум дип карала. 2013 елда ул 300 млн. сум булачак дип көтелә.
Министр аңлатып үткәнчә, 2012 елда Казанда ашыгыч медицина ярдәме күрсәтү хастаханәсен төзүгә - 850 млн. сум, 2013 елда 300 млн. сум акча җибәрелә. Хәзерге вакытта Бөек Ватан сугышы ветераннарын торак белән тәэмин итү өчен субсиядияләр күләме тәгаенләнә.
ТР Министрлар Кабинеты тәкъдимнәренең икенче блогы федераль программаларны уртак финанслауга, яңа кертелә торган учреждениеләргә ассигнованиеләр бүлеп бирүгә, республикакүләм чаралар һәм программаларга кагылышлы. Аерым алганда, яшь гаиләләрне торак белән тәэмин итү, капиталь төзелеш, юл төзелеше программаларына, яңа кертелә торган сәламәтлек саклау һәм социаль яклау учреждениеләренә, физик культура һәм спорт өлкәсендә чаралар үткәрүгә, мәдәният учрежденияләренә грантларны арттыруга, эшләмәүчеләрнең медицина иминияте өчен иминиятләштерү кертемнәре күләмен арттыруга финанслар карала.
Өченче блок бюджет акчасын бүлекләр буенча яңадан бүлеп чыгу белән бәйле.
ТР Хөкүмәте, бюджетка кертелгән тәкъдимнәр нәтиҗәсендә, Татарстан Республикасы бюджетының керем өлешен – 113 759 884,4 мең сумга (беренче укылышта 106 млрд. 476 млн. 946,1 мең сум дип каралды), чыгым өлешен 117 422 274,9 мең сумга (башта 110 млрд. 139 млн. 336,6 мең сум иде) җиткерергә тәкъдим ителә. 2011 елга бюджет кытлыгын 3 662 390,5 мең сум итеп тәгаенләү сорала.
Бүген утырышта Татарстан Хөкүмәте тарафыннан кертелгән тәкъдимнәрнең барысы да хупланды. Илдар Халиков сүзләренә караганда, бюджет проекты буенча алдан эш алып барылган, һәм комитет утырышына килешенгән карарлар чыгарылган.
КПРФ фракциясе депутатлары тарафыннан тәкъдим ителгән төзәтмәләр кире кагылды. Төзәтмәләрнең авторлары фикер алышуда бөтенләй катнашмады. КПРФ фракциясе депутатларыннан кергән тәкъдимнәр республика бюджетында каралган теге яки бу чараларны кабатлый, алар өчен киләсе елга акча каралган инде. Мәсәлән, Леонид Иванов Яшел Үзән районының Бритвино, Тукай районының Артамоновка авылларын газлаштыру өчен 100 млн. сум акча карауны сорый. Илдар Халиков һәм ТР Төзелеш, архитектура һәм торак-коммуналь министрлыгы вәкилләре билгеләп үткәнчә, газлаштыру һәм су белән тәэмин итү өчен бюджетта коммунистлар сораганнан да күбрәк акча каралган. Һәм нинди авылны газлаштырасын яки су белән тәэмин итәсен урындагы хакимият хәл итә.
Депутат, ТР Һөнәр берлекләре федерациясе җитәкчесе Татьяна Водопьянованың тәкъдимнәре түбәндәгедән гыйбарәт: ул 2012 елның беренче яртыеллыгында мәдәният өлкәсендә хезмәткә яңача түләү системасына күчү өчен, бу тармакны финанслауга каралган чыгымнарны исәпкә алырга тәкъдим итә. Шулай ук депутат тернәкләндерү белән бәйле дәвалауга (дәвалап бетерү) каралган чыгымнарны 2009 елдан да азрак расламаска (275 млн. сумнан да ким булмаска тиеш) тәкъдим итте. 2009 елдан бирле бу өлкәгә каралган сумма ике тапкыр кимегән. ТР Финанслар министры Радик Гайзатуллин 2009 елдан бирле әлеге вәкаләтләрнең федераль үзәктән төбәкләргә бирелгәнлеген һәм финанслар белән ныгытылмаганлыгын билгеләп үтте.
Татьяна Водопьянованың балалар һәм яшүсмерләрне санаторий-курортларда ел әйләнәсендә сәламәтләндерү һәм ул санны 2009 елгы күрсәткечтән дә (22 мең кеше) ким итмәү турындагы тәкъдимен ТР Премьер-министры игътибарга алды. Һәм бу эшне ни рәвешле башкарып булачагы турында уйларга киңәш итте. Шулай ук шәһәряны лагерьларын төзекләндерү, аларның материаль-техник базасын баету турындагы тәкъдим дә игътибарсыз калмады. ТР Финанс министры Радик Гайзатуллин әлеге мәсьәләне капиталь салулар программасында хәл итү мөмкинлеген әйтте. Ә Илдар Халиков мондый лагерьларның реестрын төзергә йөкләмә бирде.
Фикер алышу нәтиҗәсендә, “2012 елга, 2013 һәм 2014 еллар планлы чорына Татарстан Республикасы бюджеты турында” закон проекты ТР Дәүләт Советы тарафыннан икенче укылышта карау өчен җибәрелде.