Антон Силуанов күзәтчелек органнары санын киметергә тәкъдим итте

Беренче вице-премьер, финанс министры Антон Силуанов регулятор гильотина барышында күзәтчелек органнары санын кыскарту турындагы мәсьәләне карарга тәкъдим итте.

Бу хакта хөкүмәт утырышында сөйләшү булды, ул контроль-күзәтчелек эшчәнлеге реформасына багышланган иде.

Силуанов билгеләп үткәнчә, Россиядә күзәтчелек органнары бик күп.

"Бәлки, безгә регулятор гильотина белән бер үк вакытта аларның санын кыскарту мәсьәләсенә тагын бер тапкыр карарга кирәктер (...) Бу без нәкъ менә дәүләт хезмәткәрләрен оптимальләштерү һәм аларның саны буенча кабул иткән карарларга туры килә. Гомумән, күзәтүләр санын да, миңа калса, карарга мөмкин булыр иде", - диде ул.

Министр сүзләренчә, бизнес нәрсәнең һәм ничек тикшерелүен билгели торган закон проектларының кабул ителүен көтә. "Ә менә кем тикшерәчәге турында мәсьәлә, миңа калса, бу законнар түгел, ә гомумән алганда, без фикер алышкан мәсьәләләр элементларының берсе", - дип өстәде ул.

Медведев җавап итеп билгеләгәнчә, бизнес өчен контролерларның күпме булачагы түгел, ә "күпме кәгазь яки төрле электрон мөрәҗәгатьләр киләчәге" мөһим. Гомумән алганда, ул Силуановның тәкъдимен хуплады.

"Карарга кирәк, чөнки контроль-күзәтчелек органнары системасы – башкарма хакимият органнары системасы ул. Бу хөкүмәтнең һәм президентның компетенциясе. Президент гадәттә хөкүмәт тәкъдиме буенча теге яки бу карарларны кабул итә. Әйдәгез карыйк, нәрсәне кая кушарга, кемне кемнән аерырга", - диде хөкүмәт башлыгы.