“Татнефть” Сколковода Фәнни-техник үзәген ача

19 декабрьдә Мәскәү өлкәсенең “Сколково” технопаркы территориясендә “Татнефть” ААҖ нең Фәнни-техник үзәген ачу турында Килешү имзалау тантанасы булды. Тантаналы чарада Татарстан Президенты Рөстәм Миңнеханов, “Сколково” фонды президенты Виктор Вексельберг, “Татнефть” ААҖ генераль директоры Шәфәгать Тәхаутдинов катнашты.

Виктор Вексельберг Килешүне имзалау алдыннан бу фактны Сколково тарихында истәлекле вакыйга, дип атады. Аның сүзләренә караганда, бу вакыйганың башы Идел буе буенча беренче җитди проектлар гамәлгә ашырган һәм белгечләре Себер нефть ятмаларын өйрәнгән “Татнефть” тарихы тамырына барып тоташа. Фәнни эшчәнлеген Бөгелмәдә һәм Әлмәттә нефть чыгару машиналары төзелеше өлкәсендә башлаган В.Вексельберг, Татарстан нефтьчеләре тәҗрибәсе һәм технология дәрәҗәсе югары халыкара стандартларга туры килә, ә бу нефть ятмаларын эшкәртүне югары дәрәҗәдә тоту мөмкинлеге бирә диде. Бу мәсьәләдә дә барысы да Россия киләчәге өчен югары дәрәҗәдә әһәмияткә ия, дип белдерде ул.

Рөстәм Миңнеханов бу сүзләргә кушылып, “Татнефть” өчен фән үз позицияләрен саклау өчен төп чара булып тора диде. Компания фәннән башка ике тапкыр аз нефть чыгарган булыр иде. Бүген нефть табышы тотрыклы гына түгел, ә артып тора. Ә битум кебек яңа ресурслар инновацияләр таләп итә, ә Көнбатышта алар белән беркем дә уртаклашырга теләми. Шуңа күрә фән бирегә, Сколковога җәлеп ителәчәк, диде Татарстан Президенты. Аның сүзләренә караганда, республикада ике махсус зона (сәнәгать һәм яңалык кертү) бар инде. Алар алдан ук Сколково бүлекчәләре булыр дип күзалланган иде.

“Компаниянең тагын бер фәнни мәйданчыгы барлыкка килү нефть табышын үстерүдә яңа мөмкинлекләр ача”, - дип билгеләп үтте Ш.Тәхаутдинов.