Бюджет турындагы закон проекты Экология, табигатьтән файдалану, агросәнәгать һәм азык-төлек сәясәте комитеты утырышында каралды
Бүген Дәүләт Советында узган Экология, табигатьтән файдалану, агросәнәгать һәм азык-төлек сәясәте комитеты утырышында депутатлар 2026 елга һәм 2027 һәм 2028 елларның планлы чорына республика бюджеты турындагы закон проектын тикшерүне дәвам иттеләр. Утырыш эшендә ТР Дәүләт Советы Рәисе урынбасары Марат Әхмәтов, ТР Рәисенең парламенттагы Тулы вәкаләтле вәкиле Александр Терентьев, ТР Җир һәм мөлкәт мөнәсәбәтләре министры Фәнил Әһлиуллин һәм республика министрлыклары һәм ведомстволары вәкилләре катнашты.
Утырышны ачып профиль комитеты рәисе Азат Хамаев Дәүләт Советы Рәисе күрсәтмәсе белән комитет бюджет турындагы закон проектының аерым нигезләмәләрен карау өчен җаваплы дип билгеләде, аерым алганда, «Милли икътисад» бүлегенең «Минераль-чимал базасын торгызу», «Авыл хуҗалыгы һәм балыкчылык», «Су хуҗалыгы», «Урман хуҗалыгы»” бүлекчәләре һәм «Сәламәтлек саклау» бүлегенең «Әйләнә-тирә мохитне саклау», «Санитар-эпидемиологик иминлек» бүлекчәләре.
2026 елга һәм 2027 һәм 2028 елларның план чорына республика бюджеты проектын Татарстан Республикасы финанс министрының беренче урынбасары - Татарстан Республикасы Финанс министрлыгының Казначылык департаменты директоры Рөстәм Аюкасов тәкъдим итте.
2026 елда республика бюджеты керемнәре, закон проекты нигезендә, 498,2 млрд сум тәшкил итәчәк, чыгымнар – 512 млрд сум, дефицит – 13,8 млрд сум.
2026 елга «Әйләнә-тирә мохитне саклау» бүлеге буенча чыгымнар 545,6 млн сум күләмендә каралган, шул исәптән әйләнә-тирә мохитнең сыйфатын җайга салуга – 2,3 млн. сум, җитештерү һәм куллану калдыклары белән эш итү өлкәсендәге чараларга – 1,9 млн. сум, экологик белем бирү һәм агартуга –38 млн. сум.
«Халыкны һәм территорияне табигый һәм техноген характердагы гадәттән тыш хәлләрдән саклау, янгын куркынычсызлыгы» бүлекчәсе буенча чыгымнар Татарстан Республикасы бюджетында 1926 елга 2 млрд 601,2 млн сум күләмендә каралган.
«Татарстан Республикасында авыл хуҗалыгын үстерү һәм авыл хуҗалыгы продукциясе, чимал һәм азык-төлек базарларын җайга салу» Татарстан Республикасы дәүләт программасын гамәлгә ашыруга 2026 елга 14 млрд 289 млн сум каралган. Әлеге программа кысаларында җирле бюджетларга терлек авыруларын кисәтү һәм бетерү, аларны дәвалау, халыкны кеше һәм хайваннар өчен уртак булган авырулардан яклау чараларын оештыруга субвенцияләр бирү чыгымнары исәпкә алынган – 151,5 млн сум, шул исәптән хуҗасыз хайваннар белән эш итү буенча чаралар оештыруга – 102,1 млн сум, себер түләмәсеннән үлгән хайваннар ташланган үләт базларын һәм биотермик чокырларны карап тотуга – 49,4 млн. сум.
«Су хуҗалыгы» бүлекчәсе буенча су хуҗалыгы комплексын үстерүгә 307,8 млн сум күләмендә бюджет ассигнованиеләре каралган. «Урман хуҗалыгы» бүлекчәсе буенча 2026 елга «Татарстан Республикасының урман хуҗалыгын үстерү» дәүләт программасын гамәлгә ашыруга 738,4 млн сум юнәлдерү планлаштырыла. «Санитар-эпидемиологик иминлек» бүлекчәсе буенча 249,8 млн сум акча каралган.
Профильле комитет рәисе урынбасары Нәҗип Хаҗипов республикада йортсыз хайваннарны аулау чараларын финанслау мәсьәләсен күтәрде. Аның мәгълүматлары буенча, төбәктә сукбай этләр саны 40 меңнән артып китә. Ул әлеге максатларга республика бюджетында әлеге проблеманы хәл итү өчен бүлеп бирелгән 102 млн сумның җитәрлек булуына шик белдерде. КПРФ фракциясе депутаты Николай Атласов бәяләр үсешен һәм инфляцияне исәпкә алып, бюджетта акчаларның ни дәрәҗәдә исәпкә алынуы белән кызыксынды.
Парламентның профильле комитетларында бюджет проекты буенча фикер алышу тәмамланды. Иртәгә Дәүләт Советында фракцияләр һәм депутат төркемнәре вәкилләре, профильле министрлыклар һәм ведомстволар, иҗтимагый оешмалар җитәкчеләре катнашында 2026 елга һәм 2027 һәм 2028 еллар план чорына Татарстан Республикасы бюджеты турындагы закон проекты буенча парламент тыңлаулары узачак.