Илдар Халиков Чистай районында булды

Бүген Татарстан Республикасы Премьер-министры Чистай районының “Чистай” индустриаль паркында, иген кырлары һәм элеваторда булды. Республика Хөкүмәте башлыгын Татарстанның вице-премьеры – авыл хуҗалыгы һәм азык-төлек министры Марат Әхмәтов озатып йөрде.

“Чистай” индустриаль паркында Илдар Халиков парк мәйданы үсеше мәсьәләләре буенча киңәшмә уздырды. Татарстан Хөкүмәт рәисе билгеләвенчә, индустриаль парк үсешендә алга китеш бар. “Без беренче проектның ничек гамәлгә керүен күрәбез, тагын бер резидент бар инде. Ләкин безнең өчен проектның активрак гамәлгә керүе мөһим”,-дип ассызыклады ул, киңәшмәне ачканда.

Район иген кырларының берсендә Илдар Халиков хуҗалык җитәкчеләре белән очрашты. Марат Әхмәтов хәбәр иткәнчә, язгы чәчүлекләр бөтен Татарстан буенча корылыктан шактый зыян күрде, шуның белән бергә 1,6 млн га бөртекле ашлык чәчүлекләренең гомуми мәйданыннан барлыгы 500 мең га мәйданда уҗым чәчелгән. “Бүгенге көннең бурычы – булган уңышны сыйфатлы итеп җыеп алу. Һәр ел саен без урып-җыю вакытында 1 га дан 3 ц югалтабыз, быел болай эшләү ярамый!”,-дип белдерде ул.

Районда бөртекле ашлык чәчүлекләренең мәйданы 51,5 мең га тәшкил итә, шуларның 14 мең га уҗым. Көзге игеннәрне җыю ике көн элек башланган, хәзергә уңыш 1 га дан 21 ц тәшкил итә. “Язгы игеннәр буенча хәл катлаулырак, әлегә күпмегә икәнен әйтүе иртәрәк”,-дип хәбәр итте Чистай район башлыгы Илдүс Әхмәтҗанов.

Чистай элеваторында Илдар Халиков яңа уңышның беренче игеннәрен кабул итү тантанасында катнашты. Ул игенчеләрне бу вакыйга белән котлады. “ Күпме генә еллар узса да, теләсә кайсы халык өчен бу көн бик мөһим. Бу бәйрәмнең әһәмиятлелеге еллар узу белән кимергә тиеш түгел”,-дип ышана Илдар Халиков.

“Бу зур булмаган, ләкин бөтен республика өчен гадәттән тыш мөһим булган вакытны без тәртипле узуны телим, көз көне без республиканың иген белән тәэмин ителүен аңларлык булсын, һәрбер Татарстанлының өстәлендә икмәк булуын телим”,-дип мөрәҗәгать итте игенчеләргә Илдар Халиков.

Ул шулай ук элеваторда булып, аның бөртекле ашлыкны кабул итүенә һәм эшкәртүенә әзер икәненә ышанды.