Киләсе елга бюджет проектын әзерләгәндә хезмәт хакы буенча мәсьәләләр аерым каралды
Радик Гайзатуллин депутатларны киләсе ел бюджеты проектының төп параметрлары белән таныштырды, комитет карамагындагы мәсьәләләрнең ничек финансланачагы турында хисап тотты. Ул үз чыгышында 2014 елда федераль бюджеттан сыйныф җитәкчелеге өчен акча килмәячәген, бу максатлар өчен республика бюджетында акча карау зарурлыгын билгеләп үтте.
РФ Президентының май указларын тормышка ашыру максатыннан, 2016 елга республика бюджетында бюджет өлкәсендә эшләүчеләргә хезмәт хакы түләү өчен акча күләме 111 млрд. сумга җитәчәген хәбәр итте.
Комитет колачлаган өлкәләргә 2014 ел бюджетында акча бүленешенә килгәндә, эшләр болайрак тора. Җыелма бюджетта белем бирү өлкәсенә - 59,9 млрд. сум (әле монда федераль акчалар кермәгән), мәдәният, кинематография өлкәсенә - 6,4 млрд. сум, массакүләм мәгълүмат чаралары бүлегенә 1,153 млрд. сум акча (аның 541 млн. сумы – вакытлы матбугатка, 581 млн. сумы теле-радио тапшыруларга) карала. 2013 ел белән чагыштырганда, мәгариф өлкәсенә каралган чыгымнар 7,4 млрд. сумга арта.
2014 елда Болгар һәм Свияжск белән бәйле проектны тормышка ашыру өчен 780 млн. сум акча салынган.
Радик Гайзатуллин билгеләп үткәнчә, бюджет проектын әзерләгәндә министрлык һәм ведомстволар белән эшләнгән, килештерелгән. Хезмәт хакы буенча мәсьәләләр аерым каралган.
Бүген министр депутатларның фән өлкәсендә каралган премияләр өчен акчаның аз каралуы, музыка мәктәпләре биналарын төзекләндерү һәм яңа инструментлар сатып алу, республиканың иҗат берлекләрен финанслау, мәдәният елында узачак чараларны финанслау, ТР Композиторлар берлеге бинасын төзекләндерү белән бәйле сорауларга җавап бирде.
Министр шулай ук алдан язма рәвештә бирелгән сорауларны да җавапсыз калдырмады. “Яр Чаллы, Түбән Кама шәһәрләре һәм ТР Милли китапханә өчен яңа биналар төзүне финанслау көтеләме?” дигән сорауга ул: “Республика бюджетында капиталь салуларга 9,6 млрд. сум акча каралган. Алар әлегә бүленмәгән. Бу нисбәттән Мәдәният министрлыгы, Төзелеш, архитектура һәм торак-коммуналь хуҗалык министрлыгы белән эшләргә кирәк булачак”, - дип җавап бирде.
Аның җавабыннан аңлашылганча, ТР Милли китапханәсенә вакытлы матбугатка язылуны оештыру өчен 3 млн. сум акча арттырылган.
“Республикада балалар бакчалары өчен түләү күпмегә артачак?” дигән сорауга министр: "Монда яхшылап аңлатып бирергә кирәк. Без мәгариф министрлыгы һәм районнар, шәһәрләр белән эш алып бардык. 2013 елда мәктәпкәчә белем бирү системасына 16,3 млрд.сум акча тоту көтелә. 2012 елда бу сумма 12,2 млрд. сум тәшкил итте. 2014 елда кайдадыр 19 млрд. сум акча салынган.
Ата-аналар түли торган акча бик кискен үсә, диләр. Беренчедән, социаль яктан якланган катламнар бар. Әгәр бер кеше башына булган керем 10 мең сумга якынлашса, беренче балага түләү - 132 сумга, икенчесенә 133 сумга арта. Кайбер гаиләләрдә арту булмаячак та. Хәзерге вакытта район һәм шәһәрләр, ТР Хезмәт, мәшгульлек һәм социаль яклау министрлыгы белән берлектә социаль яклау чаралары эшләнә. Республика һәм җирле бюджетларда беренче балага – 20, икенчесенә - 50, өченчесенә 70 процент компенсация каралган”, - дип аңлатты.
Министр фикеренчә, мөмкинлекләре булган кешеләр балалар бакчалары өчен түләргә тиеш. “Әгәр бер кеше башына 20 мең сумнан артык керем чыга икән, беренче балага компенсациядән соң 2255 сум акча түләргә кирәк. Бездә 3-4 мең сум килеп чыкмый”, - диде министр