Илдар Халиков Европа реконструкция һәм үсеш банкы президенты Сума Чакрабарти белән очрашты

Татарстан Республикасы өчен Европа реконструкция һәм үсеш банкы эре финанс институты гына түгел, ә 20 елдан артык үзара мөнәсәбәтләр тарихы булган ышанычлы партнер да. Бу хакта бүген ТР Премьер-министры Илдар Халиков Европа реконструкция һәм үсеш банкы президенты Сума Чакрабарти белән очрашуда белдерде.

Очрашу Татарстан Республикасы Хөкүмәте Йортында узды. Анда Европа реконструкция һәм үсеш банкының Россия буенча идарәче директоры Наталья Ханженкова, ТР икътисад министры Мидхәт Шаһиәхмәтов, ТР сәнәгать һәм сәүдә министрының беренче урынбасары Руслан Кәбиров, “Иннополис” МИЗ генераль директоры Игорь Носов һ.б. катнашты.

Кунакларны сәламләп, Илдар Халиков 1990 елларда Европа реконструкция һәм үсеш банкы белән хезмәттәшлек итү “КАМАЗ” ны саклап калырга ярдәм итте, ә 2011 елда Европа реконструкция һәм үсеш банкы “Даймлер” компаниясе белән бергә “КАМАЗ” ААҖ акционерларының берсе булды, дип белдерде.

“Сезгә безнең төбәк белән күп эшләргә туры килә, чөнки Татарстанда бик күп Европа компанияләре урнашкан һәм республика икътисадына кызыксыну артуын күрәбез”, - диде Илдар Халиков. Ул шулай ук, дөньядагы икътисадта катлаулы хәлгә карамастан, Татарстан лидерлык позициясен саклап калырга тели, дип белдерде.

Европа реконструкция һәм үсеш банкы президенты Сума Чакрабарти Татарстан Европа реконструкция һәм үсеш банкы өчен мөһим партнер, дип белдерде. “Безнең Татарстан белән мөнәсәбәтләребезнең күпьеллык тарихы бар, һәр килүебездә безнең хезмәттәшлекнең республика икътисадын яхшы якка үзгәртүен күрәбез”, - диде ул.

Очрашу барышында Илдар Халиков “Иннополис” һәм “Смарт Сити Казан” кебек яңа проектлар турында җентекләп сөйләде. “Татарстан Европа реконструкция һәм үсеш банкы катнашында проектларны гамәлгә кую белән кызыксына, без бу проектларның уңышлы булачагына ышанабыз”, дигән ышаныч белдерде Илдар Халиков.

Искә төшерәбез, Татарстан Европа реконструкция һәм үсеш банкы делегациясе Чаллыда, “КАМАЗ” ААҖ җитештерү цехларында, “Алабуга” МИЗында булды. Бүген Сума Чакрабарти һәм аны озатып йөрүчеләр Казанда IT-парк эшчәнлеге белән танышырга һәм ТР Инвестицион үсеш агентлыгы вәкилләре белән очрашырга планлаштыра