Илдар Халиков: ”БТА-Казан” банкы проблемасы хәл ителде”

Татарстан җитәкчелеге ярдәмендә “Татфондбанк” белән бергә Кертемнәрне иминләштерү агентлыгы тарафыннан тормышка ашырыла торган, “БТА-Казан” банкын финанс яктан сәламәтләндерү механизмы, килеп туган катлаулы хәлдән чыгуга гына түгел, ә бәлки банкның киләчәге уңышлы булачагына ышанырга мөмкинлек бирә. Бу хакта бүген Татарстан Премьер-министры Илдар Халиков ТР Хөкүмәте йортында узган махсус матбугат конференциясе барышында белдерде. Анда шулай ук Татарстан Республикасы Милли банкы рәисе Евгений Богачев, “Кертемнәрне иминләштерү агентлыгы” дәүләт корпорациясенең генераль директорының беренче урынбасары Валерий Мирошников һәм “ТФБ-Холдинг” ҖЧҖ директоры, “АИКБ “Татфондбанк” ААҖ акционеры Роберт Мусин катнашты.

Валерий Мирошников хәбәр иткәнчә, Россия банкының үтенече буенча Кертемнәрне иминләшттерү агентлыгы “БТА-Казан” банкының финанс хәлен тикшерде. Банкның хәле катлаулы булып чыкты. Нәтиҗәдә “БТА-Казан” банкының лицензиясен алу түгел, бәлки финанс яктан сәламәтләндерү турында карар кабул ителде.

“Без яхшы инвестор табарга тырыштык, ул – “Татфондбанк” булды,-дип хәбәр итте В. Мирошников.
Кичәге көннән “БТА-Казан” банкында Кертемнәрне иминләштерү агентлыгының вакытлы администрациясе эшли, алар алдында берничә төп бурыч тора. Шуларның беренчесе – кертем кертүчеләр белән мәсьәләләрне хәл итү. “Алар хәзер борчылмаска мөмкин, аларның барлык кертемнәренә нормаль режимда хезмәт күрсәтеләчәк”,- дип ышандырды В.Мирошников.

“Безнең бүген мондый уңышлы вариант табуыбыз бик яхшы. Якындагы елларда финанс яктан сәламәтләндерүдән соң, “БТА-Казан Россиянең иң ышанычлы банкларының берсе булыр”,- дип белдерде Евгений Богачев.

Роберт Мусин банкның киләчәктәге үсеш стратегиясен эшләргә кирәк, дип сөйләде.
“Бүген “БТА-Казан” белән “Татфондбанк”ны стратегик берләштерү теләге юк”,- диде ул.

Татарстан Президенты Рөстәм Миңнеханов банкны сәламәтләндерү процессы белән җитәкчелек итүне Илдар Халиковка йөкләде. Аңа “Татфондбанк”ның күзәтчелек советын җитәкләү тәкъдим ителде. “Татарстан җитәкчелеге банкның катлаулы мәсьәләләре тулысынча хәл ителгәнче Кертемнәрне иминләштерү агентлыгы белән тыгыз хезмәттәшлек итәчәк”,- дип хәбәр итте Илдар Халиков.

Шуның белән бергә,ТР Хөкүмәте башлыгы, аның күзәтүендә финанс яктан закон бозуларны тикшерү булачагын белдерде. “Тикшерүләр тулы булачак, тикшерү материаллары тулысынча хокук саклау органнарына тапшырылачак, гаеплеләр җәзасын алачак. Бу безнең принципиаль позиция”,- дип ассызыклады Илдар Халиков.