Илдар Халиков: “ТКХ предприятиеләренә бурычлары өчен электр утын һәм газны сүндерергә кирәк”

ТР Премьер-министры Илдар Халиков алдагы ягу сезонына уңышлы әзерләнү өчен, бурычлы предприятиеләргә газ һәм электр утын сүндерергә өндәде. Тиешле йөкләмәне ул ТР Хөкүмәте Йортындагы киңәшмәдә бирде.

“Ягу сезоны тәмамланды. “Газпром межрегионгаз Казань”, “Татэнергосбыт”ка һәм “Генерирующая компания”гә, агымдагы түләүләрне тулы күләмдә тәэмин итү өчен, барлык кирәкле чараларны күрергә кирәк, шул исәптән, сүндерүне”, - дип белдерде ул.

ТР төзелеш, архитектура һәм ТКХ министры Ирек Фәйзуллин мәгълүматы буенча, агымдагы елның 1 нче июненә торак-коммуналь комплексы предприятиеләренең газ һәм электр энерниясен кулланган өчен срогы чыккан бурычы якынча 865 млн.сум тәшкил итә: электр энергиясен кулланган өчен - 55,8 млн. сум һәм 809 млн. сум – газ өчен.

Фәйзуллин сүзләренчә, газ өчен бурычларны бетерү өлкәсендә Азнакай, Чистай, Тәтеш, Буа, Сарман, Саба, Әтнә районнарында һәм Яр Чаллыда эш яхшы оештырылган. Бу юнәлештә эшчәнлекне Әгерҗе, Югары Ослан, Яшел Үзән, Бөгелмә, Нурлат һәм Лениногорск районы башлыкларына көчәйтергә кирәк.

Предприятиенең генераль директоры урынбасары Илгизәр Хәбибуллин сүзләренчә, “Генерирующая компания” ААҖ алдында бурыч 1 нче июньгә 2 млрд. сумнан артык. Аннан 1 млрд. 817 млн. сум – халыкның бурычы. Бурычлар буенча Казан лидер булып кала, аңа 1 млрд. 98 млн.сум туры килә. Чаллы халкы 390 млн.сум бурыч җыйган, Түбән Кама халкы - 386 млн.сум.

“Газпром межрегионгаз Казань” ЯАҖ генераль директоры Ринат Ханбиков хәбәре буенча, ТКХ предприятиеләренең газ өчен бурычы 892 млн. сумнан арткан, шул исәптән срогы чыккан бурыч - 810 млн.сум. Китерелгән мәгълүмат буенча, агымдагы елда түләүләрне җыю эше начарланган: үткән елда предприятиеләрнең 79 процентына шелтә булмаган булса, быел – 73 процентына.


Ханбиков проблемалы предприятиеләр арасында Кызыл тау коммуналь челтәрләрен, Әгерҗе районының “Теплосбыт”ын, Нурлат җылылык челтәрләрен, Бөгелмәнең җылылык челтәре предприятиесен, Яшел Үзән ПТС, Югары Осланның “Коммуналь челтәрләре”н һ.б. атады.

Агымдагы елның 1 нче июненә “Татэнергосбыт” ААҖ алдынды электр энергиясе өчен кулланучыларның срогы чыккан бурычы, компания директоры Рифнур Сөләйманов сүзләренчә, 538 млн.сум булган. Бурычның күпчелек өлеше идарәче компаниләргә, ТСЖ һәм ЖСКна туры килә. Ел башыннан үсеш 56 млн. булды, гомумән срогы чыккан бурыч - 336 млн.сум.

“Компанияләр үзләре өчен уңайлы позиция алды: халык түләсә - күчерә, түләмәсә - тиеш түгел”, - диде Р.Сөләйманов.

Утырыш соңында Илдар Халиков “Газпром межрегионгаз Казань” ЯАҖнә һәм “Татэнергосбыт” ААҖнә бурычлыларны газдан һәм уттан өзәргә кушты. “Сез сүндерергә, сүндерергә һәм тагын бер кат бар мөмкин булганны сүндерергә тиеш. Бу бик начар. Сәяси процессларга бәйсез рәвештә түләргә кирәк, аннан башка без нормаль рәвештә ягу чорына керә алмыйбыз”, - диде ул.

Премьер-министр шулай ук бурычлы предприятиеләргә закон нигезендә предприятиеләрнең банкротлыкка төшә һәм торгларга чыгарыла алуы белән янады. “Болар барысы да тикшерү документларын хокук саклау органнарына тапшыру белән бер үк вакытта барачак. Безнең башка юл юк”, - диде ТР Хөкүмәте башлыгы.