Дәүләт Думасы федераль бюджет проектын беренче укылышта 23 октябрьдә караячак
Дәүләт Думасы 23 октябрьдә утырышта федераль бюджет проектын беренче укылышта караячак, дип хәбәр итте чәршәмбе көнне түбәнге палата спикеры Вячеслав Володин Дума Советының өстәмә утырышы нәтиҗәләре буенча.
"Без бүген, беренчедән, төбәкләрнең закон чыгару җыелышларында фикер алышу башлансын өчен, бюджет проектын төбәкләргә җибәрү турында карар кабул иттек. Моннан тыш, беренче укылышта бюджетны карау датасын билгеләдек – ул 23 октябрьдә булачак", - диде ул.
Спикер парламентарийларның хәзер өч атна дәвамында проект турында фикер алышу мөмкинлекләре барлыгын билгеләп узды.
Аның сүзләренчә, Дәүләт Думасының барлык фракцияләре федераль бюджет акчаларын төбәкләргә гыйнварда кертүне күздә тоткан кануннарга төзәтмәләр кабул итәргә килешкән. "Без төбәкләргә гыйнвар аенда ук акча килсен өчен, гамәлдәге кануннарга төзәтмәләр кабул итәргә кирәк дип килештек. Бүген алар, кагыйдә буларак, июнгә керә", - диде Володин, бюджет акчаларын тотуның нәтиҗәлелеге мәсьәләсе хәзер аеруча актуаль булуын ассызыклап.
Дума фракцияләре инициативасын гамәлгә ашыру мартка кадәр сәүдә һәм конкурслар процедураларын үткәрергә мөмкинлек бирәчәк, дип билгеләде ул. "Бу акча тотуның һәм (бюджет) рублен файдалануның нәтиҗәлелеген арттырачак һәм, иң мөһиме, без моның аша Федераль Җыенга юлламасында президент куйган бурычларны хәл итүгә тизрәк ирешә алачакбыз", - дип йомгаклады түбәнге палата рәисе.
Министрлар Кабинеты 30 сентябрьдә Дәүләт Думасына 2020 елга һәм 2021-2022 елларның планлы чорына федераль бюджет проектын кертте. 2020 елда бюджет чыгымнары 19,503 трлн сум, 2021 елда - 20,634 трлн сум, 2022 елда - 21,763 трлн сум тәшкил итәчәк.