РФ Финанс министрлыгы 2019 елда өстәлгән керемгә салымнан бюджетның төшеп калучы керемнәрен 100 млрд сумнан артык дип бәяләгән

Россия Финанс министрлыгы 2019 елда өстәлгән керемгә салым буенча пилот проектны гамәлгә ашырудан бюджетның төшеп калучы керемнәре күләмен 100 млрд сумнан артык дип бәяләгән. Экспериментның чыгаруга йогынтысы кебек калган барлык параметрлар 2020 елның мартында чагыштырылачак, шуның белән ведомстволар пилотның беренче нәтиҗәләрен чыгарачак. Бу хакта Финанс министрлыгының салым һәм таможня сәясәте департаменты директоры Алексей Сазанов әйтте.

"Бу елына 100 млрд сумнан артык, 2019 ел буенча булачак. Без ел йомгаклары буенча нәтиҗәләр ясарбыз, дип килештек. Хәзер салым чоры ябылмаган, хәзер аванс түләүләре. Салым чоры ябылгач, салым базасы һәм салым суммасы формалашкач, ул вакытта нәтиҗәләр ясарга мөмкин булачак, - дип билгеләде ул. - Мартта Энергетика министрлыгыннан хезмәттәшләр белән карарбыз, минемчә пилот проектының уңышлы булуын аңлый алырбыз.

Сазанов шулай ук хәбәр иткәнчә, 100 млрд. сумлык төшеп калучы керемнәрнең күләме проект астына эләккән чыганакларда нефть чыгаруга карата проектның йогынтысын исәпкә алмый.

Өстәлгән керемгә салым экспорт пошлинасын һәм файдалы казылмалар чыгаруга салымны (өлешчә) алыштыра, ул нефть сатудан (аны чыгару һәм транспортировкалауга чыгымнарны исәпләмәгәндә) алына. Әлегә өстәлгән керемгә салым пилот проектлары өчен генә гамәлдә.