Илдар Халиков гражданнар оборонасына бәйле Бөтенроссия укуларын уздыру буенча селектор киңәшмәдә катнашты

Бүген ТР Премьер-министры Илдар Халиков гражданнар оборонасына бәйле Бөтенроссия укуларын уздыру буенча селектор киңәшмәдә катнашты, аны Россия Премьер-министры Дмитрий Медведев уздырды.

Киңәшмә башланганчы Илдар Халиков ТР Хөкүмәт Йортында гражданнар оборонасы чараларын башкаручы министрлык һәм ведомстволар, предприятиеләр һәм оешмалар җитәкчеләре алдында чыгыш ясады. Ул халыкка хәбәр итү укулары һәм процедурасы гражданнар оборонасының мөһим өлеше булуын әйтте. “Булгария”да күнегүләр ясарга кирәкми, укуларда тренировкалар ясарга кирәк”, - дип ассызыклады Илдар Халиков.

Селектор киңәшмәне ачып, Россия Премьер-министры мондый күнегүләрнең файдалы булуын әйтте. “Алар безнең мөмкинлекләрне һәм тар урыннарны күрергә, алдагы эштә юнәлешләрне билгеләргә ярдәм итәргә тиеш. Эшнең җайга салынган булуына стихияле вакыйга, техноген катастрофа турында мәгълүматның таралу тизлеге бәйле. Заманча дөньяда гражданнар оборонасы чишә торган мәсьәләләр спектры киңрәк”, - дип өстәде ул.
Дмитрий Медведев кешеләр белән эшләүне, аларга гражданнар оборонасының максатларын һәм бурычларын аңлатуның мөһимлеген ассызыклады.

Шулай ук Дмитрий Медведев селектор киңәшмәдә катнашучыларны гражданнар оборонасының 80 еллыгы белән котлады. “Безгә бик күп еллар дәвамында формалашкан системаны алга таба да яхшыртырга, аны эштә кулланырга, шулай ук заманча саклау, мониторинг технологияләре һәм фаразлау чараларын кулланырга кирәк”, - дип билгеләде ул.

Россия Гадәттән тыш хәлләр башлыгы Владимир Пучков бүген беренче тапкыр шундый тренировка уздырылуын билгеләде.

“Бөтенроссия тренировкасының беренче этабын анализлау идарә системасы һәм гражданнар оборонасы көчләре аларга куелган бурычларны үтәргә әзер, дигән нәтиҗә ясарга мөмкинлек бирә”, - диде ул.

Владимир Пучков сүзләренчә, тренировка нәтиҗәләре буенча идарә органнары һәм көчләрнең гражданнар оборонасы бурычларын үтәү һәм, заманча таләпләрне исәпкә алып, халыкны саклауга әзерлеген арттыру буенча план әзерләнәчәк.

Алга таба тренировка кысаларында башкарыла торган эш турында докладлар белән РФ берничә субъектының гражданнар оборонасы җитәкчеләре чыгыш ясады.

Сүз уңаеннан, ТРда күнегүләр түбәндәгечә уза: 4 нче октябрьда сәгать

8.45 “Сетевая компания” ААҖнә Казанда, ТЭЦ-1 подстанциясендә шартлау нәтиҗәсендә, Казанның 250 мең кешелек Вахитов һәм Яңа Савин районнарында ут беткәнлеге турында хәбәр килә. Шулай ук 3 хастаханә, 27 мәктәп, 18 балалар бакчасы, 12 котельный утсыз кала.

2 нче номерлы Республика клиник хастаханәсендә автоном ут белән тәэмин итүче дизель-генератор эштән чыга, 2 авыруның сулышын тәэмин итә торган үпкәләрга ясалма вентиляция ясау аппаратлары сүнә.

Ут беткән зонага шул вакытта юниорлар арасында каратэ буенча Россия чемпионаты уза торган Көрәш сарае эләгә.

Сарайда – 9 мең кеше. Нәтиҗәдә, зыян күрүрчеләр бар, аларның күпме булуына ачыклык кертелә. Урында янгын сүндерүчеләр һәм коткаручылар, психологлар һәм полиция көчләре эшли.