Антон Силуанов: физик затларның кеременә салым системасында үзгәрешләр мөмкинлеге бар

Россия финанс министры Антон Силуанов 2024 елга физик затларның кеременә салым алу системасын үзгәртү буенча тәкъдимнәрне карарга мөмкин, дип саный, әмма хәзер бу мәсьәлә көн тәртибендә тормый.

"Мин түбәндәгеләрне саныйм, әйдәгез без беренче пунктка әйләнеп кайтыйк, без 2024 елга кадәр салымнарның төп ставкаларын үзгәртмибез, ә 2024 елга тәкъдимнәр әзерләрбез, тәкъдимнәр карарбыз - яки бу ставканы саклап калу, яки прогрессия ясау", - диде Силуанов РБКга интервьюсында.

Ул билгеләп үткәнчә, Министрлар Кабинеты 2024 елга кадәр салым салу принципларын һәм ставкаларын үзгәртүне планлаштырмый. Шул ук вакытта, әлбәттә, аның сүзләренчә, җәмгыятьтә социаль гаделлеккә сорау бар.

"Безгә 13%ны минималь хезмәт хакын - 12 мең ала торган кеше түли, елына 12 миллион сум ала торган кеше дә 13% түли, диләр... Гаделме бу, юкмы? Мөгаен, зур керемле кешеләр күбрәк түләргә тиеш, дип әйтергә нигез бардыр", - дип өстәде министр.

Аның сүзләренчә, бүген өлешчә шулай була да, чөнки зур керемле кешеләр мөлкәткә, транспорт салымына зур салым түлиләр, әмма физик затларның кеременә салымда прогрессия юк.

"Хезмәткә салымнарны киметү мәсьәләсен карасаң яхшы булыр иде һәм шул вакытта халыкның бай катламнары өчен ставканы үзгәртү мәсьәләсен карарга мөмкин, дип әйтергә мөмкин булыр иде. Әмма хәзер безнең хөкүмәттә мондый тәкъдимнәр каралмый. Минемчә, без салымнарны 2024 елга кадәр үзгәрешсез калдыру турындагы карарны үтәргә тиеш", - дип өстәде Силуанов.