Илдар Халиков Invest in Tatarstan халыкара кышкы форумының панель дискуссиясендә катнашты

Татарстан нефтьтән соңгы тормышын ничек күзаллый, төбәктә югары квалификацияле эшче кадрлар белән тәэмин ителештә нинди проблемалар бар, чит төбәкләр һәм илләрдән эшче куллар миграциясенә Татарстан җитәкчелеге нинди карашта, алга таба төбәктә инвестицион мохитне ничек яхшыртырга була? Татарстан белән эшләргә теләк белдергән инвесторларны кызыксындырган шушы сорауларны бүген “INVEST in TATARSTAN 2012” халыкара форумы кысаларында узган Панель дискуссиясендә ТР Премьер-министры Илдар Халиковка модератор Ральф Сильва юллады.

Илдар Халиков ассызыклаганча, бүгенге көндә республиканың иктисады нефтькә генә бәйле дигән караш дөрес түгел. Инде хәзер үк яңа юнәлешләрне үстерү исәбенә нефтьнең икътисадтагы өлеше кими бара. Нефть химиясе җитештерү күләмнәре арта, машина төзелеше, мәгълүмат технологияләре үсеше һ.б. “Нефть белән бәйле булмаган секторларның елдан-ел үсешен күрәбез. Икенче яктан караганда, нефтьнең булуы да яхшы. Нефть чыгару республикада технопарклар, технополислар, махсус икътисади зоналар төзергә ярдәм итте”, - дип ассызыклады Премьер-министр.

Икътисад өчен кирәкле югары квалификацияле кадрларга килгәндә, Хөкүмәт башлыгы бу проблеманың елдан-ел актуальләшүен яшерми. Елдан-ел югары технологияләр арткан чорда бу котылгысыз. Ул заман таләбен күздә тотып, бүген республикада федераль әһәмияттәге өч эре вузга Татарстан предприятиеләре белән тыгыз интеграциясен тәэмин итү өчен сизелерлек финанслар салынуын җиткерде. “Югары уку йортлары предприятиеләр өчен, беренче чиратта, квлификацияле белгечләр әзерләүче партнер. Шул ук вакытта предприятиеләр үзләрендәге укыту үзәкләре, комбинатларында белем бирүнең торышына игътибарны арттырырга тиеш”, - ди ул. Илдар Халиков шул ук вакытта югары әзерлекле кадрларны читтән җәлеп итүнең дә нәтиҗәле булуын искәртә. Моның өчен биредә алар өчен үзләре яшәгән төбәктән яхшырак шартлар булдырырга кирәк, шул ук вакытта миграциянең катгый җайга салынган булуы да зарур, - ди ул.

Инвестицияләр җәлеп итү сәләтен күтәрү, Татарстанда инвестицион мохитне тагын да яхшырту өчен, Илдар Халиков фикеренчә, инвесторларның ихтыяҗына шунда ук җавап бирергә өйрәнергә кирәк. Бу инфраструктура төзелешендә дә, иминлекне тәэмин итү эшендә дә чагылырга тиеш. “Моннан дистә ел элек инвесторлар иминлек мәсьәләсен күтәрә иде, без моны законнар белән тәэмин иттек. Аннан соң әзер мәйданнар булдыру таләбе барлыкка килде. Хәзер бездә “Алабуга” МИЗы гына түгел, индустриаль парклар, технопарклар челтәрләре барлыкка килде. Инфраструктура төзелеше дәвам итә. Соңрак инвесторлар белән тыгыз эшләүче, аларны безнең мөмкинлекләр белән якыннан таныштыручы структура- Татарстанның Инвестицион үсеш агентлыгы барлыкка килде”, - ди ул. Аның фикеренчә, бүгенге форум да инвесторларга безнең мөмкинлекләрне, ә Татарстанга аларның яңа таләпләрен, ихтыяҗларын җиткерүгә зур өлеш кертә.