Рөстәм Миңнеханов Федераль Куркынычсызлык хезмәтенең ТР буенча Идарәсе хезмәткәрләрен һөнәри бәйрәмнәре белән котлады

Татарстан җитәкчелеге Федераль Куркынычсызлык хезмәтенең ТР буенча Идарәсе хезмәткәрләренә Универсиадада куркынычсызлык тәэмин итү буенча зур өметләр баглый. Бу хакта бүген Татарстан Президенты Рөстәм Миңнеханов Россия дәүләт иминлеге органнары хезмәткәрләре көненә багышланган тантаналы чарада белдерде.

Бу чарада ТР Хөкүмәт вице-премьеры Әскать Сәфәров, Казан мэры Илсур Метшин катнашты.

Федераль Куркынычсызлык хезмәтенең ТР буенча Идарәсе җитәкчесе Александр Антонов тантаналы чараны ачып, дәүләт иминлеге органнары хезмәткәрләренә Россия Президенты Владимир Путинның котлау телеграммасын укыды.

Р.Миңнеханов Федераль Куркынычсызлык хезмәтенең ТР буенча Идарәсе хезмәткәрләренә һөнәри бәйрәмнәре белән котлап мөрәҗәгать итте.

“Куркынычсызлык органнары һәрвакыт илнең милли мәнфәгатьләрен яклауда, суверенитетлыкка һәм территориаль бөтенлеккә янауны бетерүдә зур роль уйнады. Безнең махсус хезмәтләр тарихы чын патриотлык һәм батырлык мисалларына бай.

Бүген чынбарлык террорчылык, контркүзәтү эшчәнлегендә һәм дәүләт чикләрен яклау өлкәсендә нәтиҗәле эш таләп итә. Беренче планга халыкара террорчылыкка каршы көрәшү бурычы куела. Федераль Куркынычсызлык хезмәте тарафыннан җитди һәм күптөрле эш алып барыла, бу безнең гражданнарның тынычлыгын саклау максатыннан башкарыла.

Соңгы ике елда гына да Федераль Куркынычсызлык хезмәтенең ТР буенча Идарәсе тарафыннан Татарстан Республикасында террорлык актлары үткәрүне планлаштырган 6 радикаль экстремистик төркемнәрнең эшчәнлеге ачыкланды һәм юкка чыгарылды. Федераль Куркынычсызлык хезмәте һәм эчке эшләр органнарының профессиональ һәм төгәл эш итүләре нәтиҗәссендә 19 июльдә Татарстан мөселманнарының Диния нәзарәте лидерларына карата кылынган террорлык ачыкланды һәм юк ителде.

Агымдагы елда икътисади җинаятьләргә каршы көрәштә, бюджет предприятиеләрен криминалдан саклауда, законсыз наркотиклар әйләнешен ачыклауда, коррупциягә каршы көрәштә яхшы нәтиҗәләргә ирештегез.

Киләчәктә безне мөһим чаралар көтә. 2013 елгы Универсиада барлык көч структураларының көчләрен һәм мөмкинлекләрен мобильләштерүне, төгәл һәм профессиональ эш итүне таләп итә. Уеннарның иминлеген тәэмин итү безнең өчен өстенлекле бурыч. Уңышка ирешү гарантиясе – сезнең батырлык, чыдамлык, үз эшегезгә бирелгән булуыгыз. Без махсус хезмәтләргә зур өметләр баглыйбыз.

Залда дәүләт иминлеге органнары ветераннары да утыра. Бу өлкән буынның яшь буынга традицияләрне тапшыруын, закон принципларына, хәрби намуска тугъры калырга, Ватан һәм җәмгыять алдында җаваплы булырга өйдәүне дәлилли.

Федераль Куркынычсызлык хезмәтенең ТР буенча Идарәсенең барлык хезмәткәрләрен һәм ветераннарын һөнәри бәйрәмнәре белән котлыйм һәм авыр хезмәтләре өчен рәхмәт белдерәм. Сезгә ныклы сәламәтлек, тынычлык һәм иминлек телим”.

Татарстан Президенты Федераль Куркынычсызлык хезмәтенең ТР буенча Идарәсе хезмәткәрләренә дәүләт бүләкләре тапшырды. Шулай итеп, Идарә җитәкчесенең беренче урынбасары Динар Хәмитов “Татарстан Республикасы алдындагы хезмәтләре өчен” орденына ия булды