Халиков: “Башлыклары фермага иртәнге 5-6 ларда килә торган районнарда, савым үсеше 20 процентка җитә”

2012 елда республиканың терлекчелек тармагындагы төп күрсәткечләр хакында бүген ТР Хөкүмәте йортында Премьер-министр Илдар Халиков рәислегендә узган республика киңәшмәсендә авыл хуҗалыгы һәм азык-төлек министрының беренче урынбасары Минсәгыйрь Нуретдинов хисап тотты.

Аның сүзләренә караганда, узган ел Татарстанда 330 мең тонна ит җитештерелгән. 2011 ел белән чагыштырганда, үсеш 12 процент тәшкил иткән. Иң зур үсеш – кош итен җитештерүдә (19 процент). Дуңгыз ите җитештерү 12 процентка арткан. Ел дәвамында дуңгызлардан -1 млн баштан артык, мөгезле эре терлектән 280 баш токым алынган.

Министрның беренче урынбасары, шул ук вакытта, сөт җитештерүнең беркадәр кимүен ассызыклый. Узган ел дәвамында 1,18 млн тонна сөт савылган, бу, 2011 елга караганда, 1 процентка кимрәк. Узган елның декабрь башында республика киңәшмәләренең берсендә ТР Президенты кайбер районнарда сөт җитештерүнең сизелерлек кимүен тәнкыйть утына тоткан иде. Шуннан бирле вазгыять беркадәр уңай якка үзгәргән. М.Нуретдинов сүзләренә караганда, бүген Татарстанда тәүлеклек савым күләме 2858 тонна тәшкил итә. Декабрь башы белән чагыштырганда, әлеге күрсәткеч 12,5 тоннага арткан. Ләкин узган елның шул чорына караганда ул 30 тоннага азрак.

Киңәшмәдә вазгыятьне ТР Премьер-министры да шәрехләде. “2012 елның гомуми нәтиҗәләре начар түгел. Ел азагы нәтиҗәләре күрсәткәнчә, Президентның район башлыкларын фермаларда ешрак булырга чакыруын башлыкларның күбесе дөрес аңлаган. Район башлыклары үзләре шәхсән булган урыннарда икенче тәүлектә үк савым күрсәткечләре арткан. Бу турыдан-туры ничек тәэсир иткәндер, белмим, ләкин факт факт булып кала: зур активлык күрсәткән, башлыклары иртәнге 5-6ларда фермага килүче районнарда декабрь йомгаклары буенча савым күләме 20 процентка арткан. Урыннардагы турыдан-туры эш нәтиҗә биреп кенә калмый, ул сыйфатка ирешүнең бердәнбер ысулы да”, -дип билгеләп үтте И.Халиков.