Рөстәм Миңнеханов: “Һәр кече нефть компаниясе – эре салым түләүче”

Бүген Зәйдә Татарстан Президенты Рөстәм Миңнеханов республиканың кече нефть компанияләре җитәкчеләре белән киңәшмә үткәрде. Аларның 2012 елгы эшчәнлеге һәм 2013 елга куелган бурычлары каралды. Киңәшмәдә “Татнефть” ААҖ генераль директоры Шәфәгать Тәхаутдинов, тармак министрлыклары һәм ведомстволары, территоиаль бүлекчәләре, федераль органнар җитәкчеләре катнашты.
Рөстәм Миңнеханов киңәшмә алдыннан “Татех” нефть компаниясендә эш барышы белән танышты.
ТР Президенты киңәшмәдә билгеләп үткәнчә, газны файдалану законын катгыйлану, “Татнефть”, “Татех” һәм башка кече компанияләрнең дөрес позиция алып яхшы вәзгыятьтә калды. Шул ук вакытта иярчен газ ягучы компанияләр дә бар. Монда экология мәсьәләсе дә туа. ТР Президенты җиһазларны камилләштерү буенча Capstone компаниясе белән эшләүне дәвам итәргә тәкъдим итте.
Ягулык-энергетика комплексы роле илдә әйдәп баручылар рәтендә, якын киләчәктә дә шулай булачак, дип саный республика башлыгы. Аның сүзләренә караганда, “Татнефть” кенә түгел, ә кече нефть компанияләре дә эре салым түләүчеләр булып тора. Гомумән алганда, узган ел нефтьчеләр яхшы эшләгән. Әмма куелган бурычларын башкара алмаган компанияләр дә бар, дип билгеләп үтте ТР Президенты.
2012 елда кече нефть компанияләре 6,7 миллион тонна нефть тапкан, бу 2011 ел белән чагыштырганда, 1,5 процентка күбрәк. Республиканың гомум нефть табышының 20,5 процентын тәшкил иткән, бу күрсәткеч узган елдагы кадәр. Бу хакта бүген “Нефтеконсорциум” ЯАҖ генераль директоры Фәнис Вәлиев үз докладында белдерде. Докладчы шулай ук республика җитәкчелеге ярдәме кирәк булган булган проблемаларны да атады.
Геология һәм җир асты байлыкларын файдалану өлкәсендәге эшләр нәтиҗәләре хакында ТР буенча җир асты байлыклары файдалану идарәсе җитәкчесе Равил Мотыйгуллин белдерде. Ул РФ җитәкчелеге тармак алдына куйган бурычларга басым ясады. Ул шулай ук нефть компанияләре тарафыннан лицензияле килешүләрне гамәлгә ашыру турында да сүз кузгатты.
Быел Татарстанда Бөтенроссия яшь геологлар олимпиадасы чарасы узачак, дип белдерде Равил Мотыйгуллин.
Татарстан буенча дәүләт күзәтчелеген һәм җир асты байлыклары өлкәсе мониторингын мәгълүмат белән тәэмин итү турында Идел буе федераль округы Территориаль геология мәгълүмат фонды Татарстан филиалы җитәкчесе Гөлнара Мәүлетдинова белдерде.
Бөтенроссия геологик нефть фәнни-тикшеренү институтының Казан филиалы эшчәнлеге нәтиҗәләре һәм үсеш стратегиясе хакында генераль директор А.Солтанов белдерде. Ул Татарстан нефть компанияләре белән эшләү өчен актуаль темалар тәкъдим итте.
Рөстәм Миңнеханов киңәшмәне тәмамлап, киләчәктә дә республика нефть тармагы өчен барысын да эшләчәк, ә нефтчеләр алдына нефть табышын тотрыклы итү бурычы тора дип белдерде.