Татарстанда үзмәшгульләр саны ел башыннан 30,5 мең кешегә арткан
2023 ел башыннан Татарстанда үзмәшгульләр саны 30,5 мең кешегә арткан. Үсеш республиканың барлык муниципаль берәмлекләрендә дә күзәтелә. Моңа «Кече һәм урта эшкуарлык» илкүләм проекты кысаларында күрсәтелә торган ярдәм чаралары булышлык итә.
Ел башыннан алып, Татарстан үзмәшгульләре 22,5 млрд сумнан артык декларацияләнгән керем алган, ә аларның саны 255 меңгә җиткән.
Үзмәшгульләрнең икътисади активлыгын арттыру өчен Татарстанда ярдәм чаралары комплексы гамәлгә куелган, аларга онлайн-мәйданчыкларга чыгу һәм алар өчен махсус сәүдә урыннары һәм ярминкәләр оештыру керә. Үзмәшгульләр фикеренчә, продукцияне сатуга ярдәм итүче әлеге чаралар аларның икътисади активлыгын билгели.
Ел башыннан алып 300дән артык үзмәшгуль республика территориясендә күргәзмә-ярминкә чараларында катнашкан, шул исәптән Россия эшкуарлыгы көннәрендә 3 көнлек «Мин Татарстан инде ул» ярминкәсендә алар 10 млн сумнан артык акча эшләнгән. Һөнәри керемгә салым түләүчеләр өчен «Минем бизнес» үзәге даими рәвештә аларның продукциясен маркетплейсларга чыгару буенча бушлай укыту программалары үткәрә.
Бүген Татарстанның үзмәшгульләренә шулай ук ташламалы микрозаймнар һәм поручительство кебек дәүләт ярдәменең финанс чаралары да тәкъдим ителә. Еллык 5,5% ставкасы буенча 50 меңнән 500 мең сумга кадәр ташламалы финанслауны 3 елга кадәр срокка алырга мөмкин. Үз залог акчалары булмаган гражданнарга ТР Икътисад министрлыгына караган Татарстан Республикасы Гарантия фонды ташламалы поручительлек бирә, аның максималь күләме кредит суммасының 50% тәшкил итә, ә комиссия түләүләре 0,5% ка кадәр киметелә.
Моннан тыш, республика үзмәшгульләре «Минем бизнес» үзәгендә мәгълүмати-консультацион ярдәм ала ала. Консультацияләр барлык үзмәшгульлек мәсьәләләре буенча тәкъдим ителгән.
Шулай ук үзмәшгульләр өчен берничә преференция гамәлдә: ирекле нигездә иминият кертемнәрен башкару һәм хисап алып барудан азат ителү, декларацияне тутыру, чөнки салым органы белән барлык хезмәттәшлек «Минем салым» кушымтасы аша башкарыла.