Социаль сәясәт комитеты бюджет проекты буенча тәкъдимнәрне профильле комитетка җибәрәчәк
Бүген Дәүләт Советында Социаль сәясәт комитеты утырышы узды, анда депутатлар 2024 елга һәм 2025 һәм 2026 еллар план чорына республика бюджеты һәм Мәҗбүри медицина иминияте территориаль фонды бюджеты турында закон проектларын тикшерделәр.
Профильле комитет әгъзалары «Сәламәтлек саклау», «Социаль сәясәт», «Физик культура һәм спорт», «Яшьләр сәясәте» юнәлешләре буенча республика бюджеты параметрларын җентекләп тикшерделәр.
Социаль өлкә өлешендә республика бюджетының төп параметрлары турында депутатларга финанс министры урынбасары Гела Герасимова хәбәр итте.
«Сәламәтлек саклау» бүлеге буенча 2024 елга бюджет ассигнованиеләре 38 773,4 млн.сум күләмендә планлаштырылган. Бу бүлеккә стационар, амбулатор, ашыгыч һәм санитар-сәламәтләндерү ярдәме, объектларны капиталь ремонтлау, беренчел звеноны модернизацияләү һәм сәламәтлек саклау өлкәсендәге башка мәсьәләләр керә.
«Социаль сәясәт» бүлегендә 2024 елга 60 117,4 млн. сумлык бюджет ассигнованиеләре исәпкә алынган. Акча пенсия, социаль хезмәт күрсәтү һәм халыкны тәэмин итү, гаиләне һәм балаларны саклау һәм социаль сәясәт өлкәсендәге башка мәсьәләләргә юнәлдереләчәк.
2024 елга «Физик культура һәм спорт» бүлеге буенча консолидацияләнгән бюджет чыгымнары 4 100,7 млн.сум тәшкил итәчәк. «Яшьләр сәясәте» бүлеге буенча 3 670,6 млн.сумлык бюджет ассигнованиеләре планлаштырылган.
Алдагы өч елга бюджет сәясәтенең иң мөһим бурычлары арасында парламентарийлар элек кабул ителгән барлык социаль йөкләмәләрне үтәүне билгеләделәр, шул ук вакытта профильле комитет әгъзалары түбән керемле гражданнарга һәм балалы гаиләләргә социаль ярдәм күрсәтүгә аерым басым ясадылар.
Депутатларның тәкъдимнәре социаль сәясәт комитеты тарафыннан гомумиләштереләчәк һәм бюджет буенча җыелма нәтиҗә әзерләү өчен җибәреләчәк.