Ун айда Татарстан бюджетына 439,4 млрд сум кергән
2024 елның ун аенда Татарстанның берләштерелгән бюджетына салым һәм салым булмаган керемнәр 439,4 млрд сум күләмендә тупланды. Шулардан 366,3 млрд сум – Татарстан бюджеты һәм 73,1 млрд сум җирле бюджетларга керде, дип сөйләде Татарстан финанс министры урынбасары Алла Анфимова «Татар-информ»да узган матбугат конференциясендә.
Узган ел белән чагыштырганда керемнәр 54,6 млрд сумга яки 14,2% ка арткан. Россия регионнары белән чагыштырганда, Татарстан салым һәм салым булмаган керемнәр күләме буенча илнең барлык субъектлары арасында алтынчы урынны алган. Ә Идел буе федераль округында республика бу күрсәткеч буенча беренче урында тора.
2024 елда планлы күрсәткечләрне үтәүгә килгәндә, гыйнвар-октябрь айларында ул 91,8% яки 478,7 млрд сум тәшкил иткән.
Шул ук вакытта Татарстан территориясендә салым һәм салым булмаган керемнәр 1,3 млрд сумга якын тәшкил иткән. Аларның өчтән икесе диярлек – 828,1 млрд сум – федераль казнага китәчәк.
Узган ел белән чагыштырганда Татарстан территориясенә керемнәрнең гомуми суммасы 21,5% ка яки 249,9 млрд сумга арткан.
Татарстан бюджеты кеременең төп маддәләренең берсе физик затлар кеременә салымга туры килә – барлык сумманың 32,4% ы яисә 142,2 млрд сум. Шунысын да билгеләп үтәргә кирәк, 2023 ел күрсәткечләре белән чагыштырганда, сумма 35,6 млрд сумга яки 33,4% ка арткан.
«Керемнәрнең артуының төп сәбәпләре: уртача хезмәт хакының артуы, дивидендлар рәвешендә алынган керемнәрнең артуы», – дип билгеләп үтте Анфимова.