ТР финанс министры: 2025 елның гыйнварында җирле бюджетлар үтәлеше буенча нәтиҗәләр уңай
2025 елның гыйнварында муниципаль районнарның һәм шәһәр берәмлекләренең берләштерелгән бюджетларына 14,4 млрд. сум керде, бу еллык планлы билгеләнешләрнең 8,7% тәшкил итә. Керемнәрне җирле бюджетларга туплау динамикасы уңай. Бу хакта Татарстан Республикасы финанс министры Марат Фәйзерахманов муниципаль берәмлекләрнең финанс органнары җитәкчеләре белән 2025 елның гыйнварында җирле бюджетларның үтәлеше һәм 2025 елның гыйнвар-февралендә көтеләчәк үтәлеш мәсьәләләре буенча киңәшмәдә хәбәр итте.
Киңәшмә Татарстан Республикасы Финанс министрлыгында республиканың муниципаль районнары һәм шәһәр берәмлекләре белән видеоконференцэлемтә режимында узды.
Чарада «Татэнергосбыт» ААҖ, «Газпром Межрегионгаз Казан» ЯАҖ вәкилләре катнашты.
Киңәшмә барышында Марат Фәйзерахманов билгеләп үткәнчә, узган ел белән чагыштырганда салым һәм салым булмаган керемнәр һәм барлык төп керем чыганаклары буенча үсеш тенденциясе күзәтелә. 2025 елның гыйнварында республиканың җирле бюджетларына салым һәм салым булмаган керемнәр узган елга карата 115,4% тәшкил иткән.
2025 елның гыйнварында кергән керемнәр һәм ел башына калган чаралар бюджетларның чыгым йөкләмәләренең үтәлешен тәэмин иткән. Социаль әһәмияткә ия барлык чыгымнар вакытында һәм тулы күләмдә башкарылган, җирле бюджетларның планлаштырылган беренче чираттагы чыгымнары җитәрлек күләмдә финансланган.
"Ел дәвамында киеренкелекне булдырмау һәм керемнәрнең тотрыклылыгын тәэмин итү өчен бюджетларны балансларга кирәк. Моңа бәйле рәвештә, бюджет акчаларын экономияле һәм сакчыл тотып, салымнарны максималь туплауны тәэмин итү мөһим", - дип билгеләп үтте Татарстан Республикасы финанс министры.