Инновация үзәкләре резидентларын кече һәм урта эшмәкәрлек реестрына кертү турында законга кул куелды
Россия Президенты Владимир Путин инновацион фәнни-технологик үзәкләр резидентларын кече һәм урта эшмәкәрлек субъектлары реестрына кертү турындагы канунга кул куйды.
Закон нигезендә кече һәм урта эшмәкәрлек реестры Федераль салым хезмәтенең компания керемнәре турындагы мәгълүматлары нигезендә формалаштырыла. Шул ук вакытта инновацион фәнни-технологик үзәкләрдә катнашучылар салым хисабын тапшыру бурычыннан азат ителә. Нәтиҗәдә, төзәтмәләр кертелгәнче, барлык критерийларга формаль җавап бирсәләр дә, алар турында мәгълүмат булмау сәбәпле, әлеге компанияләр кече һәм урта эшмәкәрлек реестрына кертелмәде. Шуның аркасында алар дәүләт ярдәме чараларына, шул исәптән субсидияләр, ташламалы кредитлар һәм сатып алулардан мәхрүм ителде.
Дәүләт башлыгы имзалаган закон инновацион фәнни-технологик үзәкләрдә катнашучыларны кече предприятиеләр рәтенә кертә һәм идарәче компанияләрне һәр июль Федераль салым хезмәтенә үз резидентлары реестрын тапшырырга мәҗбүр итә. База искермәсен өчен идарәче компанияләр исемлеген Икътисади үсеш министрлыгы юнәлтеп торачак, бу салым хезмәтенә компанияне хәтта хисаплылыгы юк вакытында да күрергә мөмкинлек бирәчәк.
Болар барысы да инновацион фәнни-технологик үзәкләрдә катнашучыларның кече һәм урта эшмәкәрлеккә ярдәм системасыннан очраклы рәвештә чыгып китү куркынычын бетерә һәм аларга әлеге механизмнардан файдалану мөмкинлеген тәэмин итә. Төзәтмәләрдә шулай ук инновацион фәнни-технологик үзәкләрдә катнашучыларны кече һәм урта эшмәкәрлек субъектларының бердәм реестрына кертү өчен күчеш тәртибе каралган.