Илдар Халиков РФ Пенсия фонды Татарстан бүлегенең киңәйтелгән коллегиясендә катнашты

РФ Пенсия фондының ТР буенча бүлегенең төп функциясе, әлбәттә, пенсия буенча бурычларны вакытында үтәп баруда. Алар былтыр тиешле сыйфатта үтәлгән һәм шикаятьләр тудырмаган – бу төп күрсәткеч. Бүген ТР Премьер-министры Илдар Халиков, ТР буенча пенсия бүлегенең киңәйтелгән коллегия утырышында шулай дип белдерде.
Утырышта ТР Дәүләт Советының социаль сәясәт мәсьәләләре буенча комитет рәисе Светлана Захарова, ТР Президентының социаль мәсьәләләр буенча ярдәмчесе Татьяна Ларионова, ТР муниципаль берәмлекләр советы рәисе Минсәгыйть Шакиров, ТР профсоюзлары федерациясе җитәкчесе Татьяна Водопьянова, Пенсия фондының ТР буенча бүлегенең шәһәр-район идарәләре башлыклары катнашты.

2013 нче елгы эшчәнлекнең төп күрсәткечләрен утырышта катнашучыларга бүлек идарәчесе Марсель Имамов җиткерде. “Ә агымдагы 2014 нче ел үзгәрешләренә килгәндә, 1 нче февральдән хезмәт пенсияләренең 6 процентка тигез үсеше көтелә. 1 нче апрельдән хезмәт пенсияләре янә 2 процентка артачак, социаль пенсияләр – 17,6, айлык акчалата түләүләр 5,5 процентка үсәчәк. Августта эшләүче пенсионерларның хезмәт пенсияләре традицион төстә кабаттан исәпләнәчәк”, - дип белдерде Марсель Имамов.

Россия Пенсия фондының Татарстандагы органнары тарафыннан былтыр 1,6 миллион дәүләт хезмәте күрсәтелгән. Аларның 32 проценты – электрон рәвештә. Илдар Халиков пенсия мәсьәләләре өлкәсендә электрон хезмәтләр системасы үсешенең бүлекнең уңай эшчәнлеге критерийларының берсе булуын ассызыклады.

Уңай тенденцияләр арасында Премьер-министр, республикада пенсия түләүгә юнәлтелүче шәхси акча күләменең еллык кыскаруы процессын туктатуга ирешүне билгеләп үтте. Узган елда бу күрсәткеч хәтта бер процентка арткан да. Илдар Халиков бу тенденциядә, предприятие җитәкчеләренең хезмәт җитештерүчәнлеген арттыру мөһимлеген аңлавы чагылыш табуын әйтеп узды.

Җитди мәсьәләләрнең берсе – бурычлылар белән эшчәнлек алып бару. “Бу эш күп кенә эре предприятиеләргә кагыла. Аны быел тагын да активрак төстә дәвам итәргә кирәк. Бурычны каплау мәсьәләсен катгыйрак куярга кирәк. Принципиальлек максималь булырга тиеш”, - дип басым ясады Илдар Халиков. Ул бурычлыларга мисаллар китереп, “Хитон”,
“Энергогазкомплект” җәмгыятьләрен, Яр Чаллыда, Түбән Камадагы берничә эре заводны һәм башка оешмаларны телгә алды. “Бурычлылар арасында муниципаль һәм бюджет предприятиеләре дә бар – монысын мин аңлап бетермим. Мондый һәр очрак гадәттән тыш хәл буларак кабул ителергә тиеш. Моңа бөтенләй юл куярга ярамый, республика бюджеты төзелгән, тотрыклы төстә үтәлә, ә муниципаль яки дәүләт предприятиеләренең бурычлылар исемлегенә эләгүе – җитәкчеләрнең гап-гади эленке-салынкы йөрүе нәтиҗәсе”, - дип Хөкүмәт башлыгы мондый оешмаларны тәнкыйть утына тотты. Ул 31 нче декабрьгә булган мәгълүматлардан күренгәнчә, әҗәтле 21 учреждение исәпләнүен искәртеп узды. “Вакытында түләмәүчеләргә кырысрак булыгыз. Минем бүген шелтә ясавыма да сылтагыз”, - дип мөрәҗәгать итте Илдар Халиков Марсель Имамовка.

Хөкүмәт башлыгы пенсия бүлегенең бердәм ведомствоара хезмәттәшлек режимында эшләгәнен һәм бу юнәлештә эшнең яхшы җайга салынганын ассызыклап үтте. “Төгәл эш күзәтелә, нибары бер тапкыр ел башында гына бер тоткарлык теркәлгән”, - дип белдерде Премьер-министр.
“Тулаем алганда, күләмле эш башкарылган. Бу кадрларның профессиональлеген, эшкә карата намуслы карашын күрсәтә. 2014 нче елда да нәтиҗәле эшчәнлеккә ирешербез, дип ышанам”, - дип тәмамлады чыгышын Илдар Халиков.
Коллегия азагында Премьер-министр ведомство алдынгыларына дәүләт бүләкләрен тапшырды.