ТР Премьер-министры: “ТР Мәгълүматлаштыру һәм элемтә министрлыгының бурычы – тармак проектлары өчен ИТ-инфраструктураны тәэмин итү”

ТР Мәгълүматлаштыру һәм элемтә министрлыгының бурычы – ТР социаль-икътисади эшчәнлегенең төрле өлкәләре һәм тармакларына мәгълүмат технологияләрен кертү өчен инфраструктура булдыру һәм үстерү. Бу хакта бүген ТР Премьер-министры Илдар Халиков министрлыкның йомгаклау коллегиясе барышында белдерде. Коллегия эшендә шулай ук РФ Элемтә һәм гаммәви коммуникацияләр министры Николай Никифоров, “Россия почтасы” ФГУП генераль директоры Дмитрий Страшнов катнашты.

ТР Мәгълүматлаштыру һәм элемтә тармагының 2013 елдагы эш нәтиҗәләре һәм 2014 елга бурычлары турында ТР мәгълүматлаштыру һәм элемтә министры Роман Шәйхетдинов доклад ясады. Беренче чиратта ул дәүләт һәм муниципаль хезмәтләрне электрон рәвештә күрсәтү системасының үсеше хакында хәбәр итте. Дәүләт һәм муниципаль хезмәтләрне электрон рәвештә күрсәтү инфраструктурасы хәзерге вакытта 314 инфоматлардан, дәүләт хезмәте порталыннан, call-үзәктән тора. Роман Шәйхетдинов сүзләренчә, 2014 елга төп бурыч- электрон рәвештә 40 млн дәүләт хезмәте күрсәтү.

Дмитрий Страшнов үзенең чыгышында, Татарстан “Россия почтасы” өчен мөһим төбәк булып тора, дип белдерде. Татарстан почта хезмәткәрләренең 2013 елдагы кереме 2,6 млрд сум тәшкил иткән. 2014 елга планда киләчәктә хезмәткәрләрнең хезмәт хакын күтәрү, “Казан” аэропортында логистика үзәге төзелешен башлау каралган.

Николай Никифоров гомумән Россия буенча тармак үсешенең төп юнәлешләре турында сөйләде.

Илдар Халиков үзенең чыгышында беренче чиратта Универсиадага әзерлек вакытында элемтәчеләрнең эшен билгеләп үтте. Аның сүзләренчә, барлык мәсьәләләр дә исәпкә алынган, һәм элемтә сыйфаты югары дәрәҗәдә булды.

Татарстан үсешенең зур проекты - Иннополис шәһәре. Универсиада чорында бу проект буенча аерым бер тоткарлыклар, проект эшләрен тәгаенләү булса да, бүгенге көндә барлык сораулар хәл ителгән, - дип белдерде Премьер-министр.” Ачылыш көннәрендә тасма
киселгәндә, файдалануга буш офислар бирелергә тиеш түгел, аларны файдаланылышка резидентлар, яңа проектлар, белгечләр белән тулындырып тапшыру зарур. Проект котылгысыз, ул баштагы этапта уйланылганча төгәлләнергә тиеш”, - диде Премьер-министр.

Илдар Халиков хәбәр иткәнчә, республика җитәкчелеге сәламәтлек саклау өлкәсендә IT-технологияләрне гамәлгә кертүдән зур нәтиҗәлелек көтә. ГЛОНАСС+112 системасын камилләштерү буенча зур эш башкару мөһим. “Оператив хезмәтләр элемтәсе һәм эшенә кагылсак, - эш җайга салынган. Әмма мин “гражданлык” министрлыкларының да ГЛОНАСС+112 дә эшләүнең нәтиҗәлелегенә игътибар юнәлтүен сорар идем”, - дип белдерде ул.

Премьер-министр 2014 елда “Электрон торак-коммуналь хуҗалык” системасын гамәлгә кертүне мөһим бурыч дип билгеләде. Илдар Халиков РФ элемтә һәм гаммәви коммуникацияләр министры Николай Никифоровка, Татарстанның бу системага сынау төбәге буларак кертелүе өчен, рәхмәт белдерде. “Бу системаны мөмкин кадәр тизрәк җайга салып, ТКХ хезмәтләренең үтә күренмәлелеген тәэмин итеп, түләүләр системасын гадиләштереп булачагына ышанам ”, - диде Илдар Халиков.

Узган ел гамәлгә кертелгән “Ачык Татарстан” проектына тукталып, Илдар Халиков бу системадан файдаланучы түрәләрне үз тәкъдимнәрен, система эше буенча искәрмәләрен җиткерергә чакырды.

Коллегия тәмамланганда Илдар Халиков һәм Николай Никифоров дәүләт һәм ведомство бүләкләрен тапшырды, һәм шулай ук иң яхшы рәсми интернет-сайтлары өчен министрлык һәм ведомстволарны бүләкләделәр.