Татарстан Республикасы Президенты: «Универсиадага әзерлек республика транспорт комплексын җитди үзгәртте»

Татарстан транспорт тармаклары Казандагы Бөтендөнья җәйге универсиадасына әзерлек һәм аны уздыру барышында зур эш башкарды, бу бөтен тармакны җитди модернизацияләргә ярдәм итте. Бүген Татарстан Республикасы Президенты Рөстәм Миңнеханов ТР Транспорт һәм юллар хуҗалыгы министрлыгының йомгаклау коллегиясендә чыгыш ясаганда шушы фикерне әйтте. Коллегия эшендә шулай ук Россия Федерациясе транспорт министры Максим Соколов, Россия Федерациясе Президентының Идел буе федераль округында тулы вәкаләтле вәкиле урынбасары Галина Изотова да катнашты.

Татарстан Республикасы юллар хуҗалыгы һәм транспорт министры Ленар Сафин үз нотыгында 2014 елда республика транспорт тармагы алдында торган бурычларга тукталды. Җәмәгать транспорты өлкәсендә ул автомобиль транспорты йөртүчеләрне комплекслы әзерләү системасын булдырырга һәм аларның рус телен, юл хәрәкәте кагыйдәләрен белелүләренә тест уздырырга тәкъдим итте. Казан җир өсте һәм җир асты электр транспорты техникумы базасында ресурсларның сертификацион үзәген булдыру тәкъдим ителә. Уку һәм квалификация арттыруга җәмәгать транспортының барлык персоналын да җибәрү тәкъдим ителә.
Ленар Сафин Татарстан җитәкчелегенә һәм шәхсән Рөстәм Миңнехановка 2013 елда шәһәр яны юнәлешләре буенча ташламалар алучыларны йөртүгә киткән чыгымнарны компенсацияләү турында карар кабул ителгән өчен рәхмәт белдерде.

Татарстанда авиация транспортында пассажирлар агымы 2012 ел белән чагыштырганда 24%ка артты. «Казан» аэропорты 1,8 миллионнан артык пассажирга хезмәт күрсәтте.

2013 елда Татарстан аэропортларыннан региональ авиация тарафыннан 1605 очыш ясалган, 26 мең пассажирга хезмәт күрсәтелгән. «Безнең төп бурыч - 2014 елда региональ пассажирлар йөртүне арттыру», - диде Ленар Сафин.

Тимер юл транспортын үстерүнең эре проектларыннан берсе итеп Ленар Сафин Казанда транспорт-күчеп утыру нокталары төзүне атады. «Без якын киләчәктә аны төзүгә керешәчәкбез», - дип хәбәр итте министр.

Автомобиль транспортында Казаннан алып Чаллыга кадәр М7 трассасын реконструкцияләү өстенлекле булып тора. Татарстанда җирле әһәмияттәге юлларны модернизацияләү һәм салу муниципаль юллар фондлары булдыруга ярдәм итәчәк, аларга 2014 елда 850 млн сум кертү планлаштырыла.

Россия Федерациясе Президентының Идел буе федераль округында тулы вәкаләтле вәкиле урынбасары Галина Изотова хәбәр иткәнчә, вәкиллек округ регионнары белән бергә елга транспортында региональара пассажирлар йөртүне торгызу буенча сынау проекты эшләнә. «Һәм Татарстан һәрвакыттагыча монда да әлеге проектның инициаторы һәм координаторы булды», - диде Г.Изотова.

Россия транспорт министры чыгышында Татарстан Республикасының транспорт тармагы өчен 2013 ел үзенчәлекле булганын билгеләп үтте. «Универсиада аркасында республиканың бөтен транспорт инфраструктурасын кардиналь рәвештә үзгәртеп булды. Һәм бүген бу инфраструктура илнең бөтен транспорт системасын үзгәртүгә этәргеч булды», - дип белдерде М.Соколов.

Министр хәбәр иткәнчә, ЮТМ проекты бүгенге көндә тулысынча әзер, елның беренче кварталында аны ил җитәкчелегенә тәкъдир итү планлаштырыла, һәм төп мәсьәлә акча табуда гына булачак. «Әлеге проект бөтен илдәге тормышны кардиналь рәвештә үзгәртәчәк», - дип ышанып әйтте Максим Соколов.

Максим Соколов шулай ук елга транспортында региональара пассажирлар йөртүне торгызу проектын да хуплады.

Автомобиль юлларын үстерү турында сөйләгәндә, Максим Соколов муниципаль юл фондларына өметен белдерде, аның фикеренчә, алар юл хуҗалыгын планлаштыруда көчле җиһаз булачаклар.

Татарстан Президенты Рөстәм Миңнеханов, коллегиягә нәтиҗә ясап, шулай ук Универсиаданың уңай йогынтысын ассызыклады. «Универсиадага әзерләнүнең 5 елында без Казанның транспорт комплексын бик җитди үзгәрттек», - дип әйтте ул.

Ул Россия Президентына, Хөкүмәтенә, РФ транспорт министрлыгына бу мәсьәләдәге ярдәмнәре өчен рәхмәт белдерде.

Республика транспорт комплексының алдынгы мәсьәләләре арасында ТР Президенты «Европа - Көнбатыш Кытай» коридорын төзүне атады. «Казахстан һәм Кытай үз өлешләрен төзегән, хәзер безгә эшлисе калды. Татарстан үз чиратында әзер, әмма федераль ярдәм кирәк», - дип саный Рөстәм Миңнеханов.

Ул тагын бер кат югары тизлекле тимер юл магистрале проектын яклап чыкты. «Без югары тизлекле магитраль проектын ашыруда максималь рәвештә ярдәм итәчәкбез», - дип ышандырды Максим Соколовны Рөстәм Миңнеханов.

Татарстан Президент шулай ук республикада елга транспортында региональара пассажирлар йөртү проекты һәм транспорт тармагындагы башка проектлар ашыралачагында ышандырды.

Коллегияне тәмамлап Максим Соколов һәм Рөстәм Миңнеханов Татарстан транспорт комлексы хезмәткәрләренә бүләкләр тапшырдылар.