Казанда ТР Хөкүмәте премиясенә IX Республика конкурсы лауреатларын бүләкләделәр

Бүген ТР Министрлар Кабинетында сыйфат өчен ТР Хөкүмәте премияләренә республика конкурсы җиңүчеләрен һәм лауреатларын бүләкләү тантанасы булды.
Бүләкләүдә ТР Премьер-министры Илдар Халиков, ТР Премьер-министры урынбасары – сәнәгать һәм сәүдә министры Равил Зарипов, министрлык һәм ведомство, предприятие һәм оешма җитәкчеләре катнашты.

И.Халиков билгеләп үткәнчә, әлеге конкурс инде 9 нче ел уздырыла. “Бу җиңүчеләрне билгеләү механизмында ышаныч дәрәҗәсе югары булган конкурсларның берсе”, - дип ышана И.Халиков. Аның сүзләренчә, предприятиеләрнең эшчәнлек сыйфаты конкурс комиссиясе белән генә түгел, ә аларның партнерлары һәм клиентлары тарафыннан бәяләнә.

Әлеге конкурска 2003 нче елда нигез салынган. Конкурсны уздыру дәвамында анда якынча 700 предприятие һәм оешма катнашкан. ТР Премьер-министры урынбасары – сәнәгать һәм сәүдә министры Равил Зарипов сөйләп үткәнчә, үткән елда конкурста катнашуга гаризаларын 82 оешма тапшырган, шул ук вакытта 5 гариза башка субъекттан: Башкортстан һәм Мордовия Республикалары, Түбән Новгород һәм Свердловск өлкәләре, Краснодар крае предприятиеләреннән дә булган. “Казан, Яр Чаллы, Әлмәт, Түбән Кама, Яшел Үзән һәм Әтнә районнары предприятиеләре һәм оешмалары иң зур активлык күрсәткән”, - дип өстәде Р.Зарипов. Аның сүзләренчә, шул ук вакытта сәнәгать һәм мәгариф өлкәләре, хезмәт күрсәтү өлкәсе предприятиеләре һәм оешмалары актив булган.

Конкурсның Казандагы этабына 41 предприятие сайлап алынган, шул исәптән 2се Башкортстаннан һәм Мордовиядән. Соңыннан конкурсның 8 лауреаты һәм 18 дипломанты билгеләнгән, бүген аларга дипломнар һәм бүләкләр тапшырылды.

“А.М.Горький исемендәге Яшел Үзән заводы” ААҖ (Яшел Үзән шәһәре), “Пакер” фирмасы” ҖЧҖ (Октябрьск шәһәре, Башкортстан), “Татнефть – АЗС үзәге” ҖЧҖ (Әлмәт шәһәре), “Чалныводоканал” ЯАҖ (Яр Чаллы шәһәре), “Төбәкара клиник-диагностика үзәге” дәүләт автоном предприятиесе (Казан шәһәре), “Тиссан” ҖЧҖ (Яр Чаллы шәһәре),
Бөгелмә машина төзелеше техникумы (Бөгелмә шәһәре), Казан шәһәренең “Торак-коммуналь хуҗалыгын һәм тышкы уңайлыклар булдыруны тәртиптә тоту буенча шәһәр программаларын тормышка ашыруны техник күзәтү хезмәте” МУП конкурсның җиңүчесе булды.

“Цветлит” ЯАҖ, “Нижнекамскшина” ААҖ, “КАМАЗ” ААҖ тимерчелек заводы, “Челны-Бройлер” ҖЧҖ, ТР Сәламәтлек саклау министрлыгының 4 нче номерлы шәһәр хастаханәсе, Республика балалар клиник хастаханәсе, 16 нчы номерлы шәһәр клиник хастаханәсе, “Татнефть-РемСервис” ҖЧҖ, “Бакирово” санаторие, Алабуга политехник көллияте, 41 нче номерлы һөнәри көллият (Казан) кебек оешмалар - конкурсның дипломантлары арасында.

Моннан тыш, кайбер предприятие һәм оешмалар, сыйфат өлкәсендә уңышларга ирешкән өчен, грамоталар белән бүләкләнде. ТР Премьер-министры бүләкләү тантанасына йомгак ясап, ассызыклап үткәнчә, конкурсның җиңүчеләре һәм дипломантлары булган күп кенә предприятиеләр Татарстанда һәм Россиядә генә түгел, ә чит илдә дә билгеле. “Бүген бүләкләнүчләр арасында мәгариф, сәламәтлек саклау системалары вәкилләренең күп булуы куандыра, һәм бу очраклы түгел, чөнки респбуликада әлеге юнәлешләрдә күп эш башкарылды”, - дип билгеләде И.Халиков.

Ул конкурсның җиңүчеләре һәм дипломантлары булган предприятие һәм оешмаларның коллективларын котлады һәм сыйфат өчен ТР Хөкүмәте премиясенә X конкурсның башлануы турында игълан итте.

Чара соңында ММЧда иң яхшы басмага “Эшче һәм инженер һөнәрләре абруе” республика конкурсына нәтиҗәләр ясалды.