Алексей Песошин КХР Торак йортлар, шәһәр һәм авыл төзелеше министрлыгының Планлаштыру, финанслар һәм халыкара элемтәләр департаменты генераль директоры Хэ Синхуа белән очрашты

Бүген Татарстан Республикасы Премьер-министры вазыйфаларын башкаручы Алексей Песошин Кытай Халык Республикасы (КХР) Торак йортлар,шәһәр һәм авыл төзелеше министрлыгының Планлаштыру, финанслар һәм халыкара элемтәләр департаменты генераль директоры Хэ Синхуа җитәкчелегендәге КХР делегациясе белән очрашты.
Очрашу Татарстан Республикасы Хөкүмәте йортында узды.

Кунакларны сәламләп, Алексей Песошин, Татарстан җитәкчелеге 2011 елдан Кытай коллегалары белән икътисадның күп юнәлешләре буенча актив хезмәттәшлек итә, дип белдерде.Ул кыскача Татарстанның икътисади потенциалы турында сөйләде. 2013 елда төп капиталга инвестицияләр күләме 15 млрд. АКШ доллары тәшкил иткән. Аның сүзләренчә, икътисадның киләчәктәге үсеше һәм төп капиталга инвестицияләр кертү, “Татнефть”, “КАМАЗ”, “ТАИФ” кебек зур предприятиелщр хисабына планлаштырыла.

Алга таба очрашуда ике яктан да катнашучылар төзелеш өлкәсендәге мәсьәләләр буенча фикер алыштылар.
Аерым алганда, ТР төзелеш, архитектура һәм торак-коммуналь хуҗалыгы министры Ирек Фәйзуллин, КХР делегациясенең Казандагы очрашу барышында берничә төзелеш мәйданчыгында булуы һәм киләчәктә хезмәттәшлек турында фикер алышулар планлаштырылганы хакында хәбәр итте.

Кытай делегациясе әгъзалары, Казан аларда матур тәэсирләр калдыруын белдерделәр. Сезнең шәһәр үсә һәм күп объектлар төзелә, диде Хэ Синхуа.