Рөстәм Миңнеханов эш сәфәре белән Колумбиягә килде

3 ноябрьдә, көннең икенче яртысында Татарстан Республикасы Президенты Рөстәм Миңнеханов ике көнлек (2014 елның 3-4 ноябрендә) эш сәфәре белән Богота шәһәренә, Колумбиягә килде.

Богота халыкара аэропортында аны Россия Федерациясенең Колумбиядәге Гадәттән тыш һәм Тулы вәкаләтле Илчесе Павел Сергиев каршы алды.

Колумбиядәге визиты кысаларында Рөстәм Миңнеханов Богота җәмәгать транспорты системасы эше белән танышачак, шулай ук ANDI (Колумбия эшкуарларының милли ассоциациясе) җитәкчелеге белән очрашачак.

Колумбия-Россия Сәүдә палатасында оешма җитәкчелеге белән очрашу узачак, шулай ук хезмәттәшлек турында килешүгә имза салыначак.

Моннан тыш, Татарстан Республикасы Президенты эш программасында Колумбия тышкы эшләр министры вазыйфаларын үтәүче Патти Лондоньо белән очрашу планлаштырылган.

Татарстан Республикасы делегациясе составында – Татарстан Республикасы Президентының халыкара мәсьәләләр буенча киңәшчесе Радик Гыйматдинов, Татарстан Республикасы Инвестицион үсеш агентлыгы җитәкчесе Талия Миңнуллина, Татарстан Республикасы Сәүдә-сәнәгать палатасы рәисе Шамил Агиев, «КАМАЗ» ААҖ генераль директоры Сергей Когогин, «Татнефть» ААҖ генераль директоры Наил Маганов, «Иннополис» МИЗ» ААҖ генераль директоры Игорь Носов, «АК БАРС» БАНК» ААҖ идарәсе рәисенең беренче урынбасары Зөфәр Гәрәев һәм башкалар.