Рөстәм Миңнеханов: «Күп балалы гаиләләр – чын үрнәк»
Бүген, Аналар көне бәйрәме алдыннан Казан Кремлендә Татарстанның күп балалалы гаиләләрен хөрмәтләү тантанасы узды. «Ана даны - Материнская слава» медальләрен Татарстан Республикасы Президенты Рөстәм Миңнеханов тугыз күп балалы анага тапшырды.
Казан Кремленең Кабул итүләр залында җыелганнарны сәламләп, Татарстан Президенты билгеләгәнчә, республика ныклы һәм тату гаиләләр белән данлыклы. ТРда 1,1 миллион гаилә исәпләнә, агымдагы ел башыннан гына да 28,5 мең никах теркәлгән, аларның 5280 - катнаш никахлар. «Ныклы катнаш гаиләләр – республикада тынычлык саклану нигезе», - дип ассызыклады Рөстәм Миңнеханов.
Ул хәбәр иткәнчә, Татарстанда балаларны табу һәм яшь буын татарстанлыларын тиешле тәрбияләү өчен бөтен шартлар бар.
Моны яңа туган сабыйлар саны арту дәлилли. Рөстәм Миңнеханов билгеләп үткәнчә, 2014 елның 10 аенда 48 меңнән артык бала туган, бу 2013 елның әлеге чоры белән чагыштырганда 319га күбрәк. Аларның яртысыннан артыгы гаиләләрдә икенче һәм аннан соңгы бала булып килгән.
«Күп балалы гаиләләр саны арту – бик шатлыклы», - дип белдерде ТР Президенты.
Аның сүзләренчә, республикада балалы гаиләләргә ярдәм итү максатында бер төркем чаралар гамәлгә ашырыла. Сәламәтлекне модернизацияләү кысаларында перинаталь ярдәм хезмәте ныгытыла. Быел Казанда РКХ нигезендә 200 урынлык перинаталь үзәк төзелеше башланды. Мәктәпкәчә белем бирү учреждениеләренә чиратны бетерү максатында соңгы биш елда республикада 34 мең яңа мәктәпкәчә яшьтәге балаларга урыннар булдырылды, 200дән артык яңа балалар бакчасы ачылды. 2014 елда гына тагын 10 415 өстәмә мәктәпкәчә яшьтәге балаларга урын булдыру планлаштырыла.
Моннан тыш, бүгенге көндә республикада күп балалы гаиләләргә 22 меңнән артык җир кишәрлеге бирелгән, 2007 елдан башлап биш һәм аннан артык балалары булган гаиләләрне торак сертификатлары белән тәэмин итү прораммасы тормышка ашырыла.
Рөстәм Миңнеханов сүзләренчә, республика җитәкчелеге сәясәтенең социаль юнәлешен республика бюджетының чыгымнар структурасы да чагылдыра: киләсе елга каралган чыгымнарның 68 % - социаль әһәмияткә ия бурычылар өчен. Бюджетта социаль ярдәм күрсәтүгә каралган һәр бишенче сум гаиләләрне яклауга юнәлдерелә.
«Без һәрвакыт гадәти гаилә кыйммәтләрен саклауга, җәмгыятьтә гаилә әһәмиятен арттыруга игътибар иттек, - дип ассызыклады Рөстәм Миңнеханов. - Аналар көнендә күп балалы әниләрне «Ана даны - Материнская слава» медале белән бүләкләү күркәм гадәткә әверелде. 15 ел эчендә 1303 ана бүләкләнгән. Бүген мин зур шатлык хисе белән әлеге дәүләт бүләген тагын 9 анага тапшырам».
Моннан тыш, Татарстан Президенты искәрткәнчә, 2013 елдан «Зур гаилә» хәйрия акциясе кысаларында 7 һәм аннан артык бала тәрбияләүче күп балалы гаиләләрне автомобиль белән бүләклиләр (аларны инде 19 гаилә алды). Бүген автомобиль ачкычларын тагын 3 Татарстан гаиләсенә тапшырдылар.
«Балалар сәламәт булсын, яхшы мәктәпләргә йөрсен өчен, без алга таба да гаилә тынычлыгы, уңайлыгы өчен шарталар булдырачакбыз, - дип белдерде Рөстәм Миңнеханов чыгышын йомгаклап. – Һәр Татарстан гаиләсенә сәламәтлек, иминлек, тынычлык һәм тату яшәүне телим».
Ул тугыз күп балалы гаиләләргә «Ана даны - Материнская слава» медальләрен, шулай ук өч гаиләгә автомобиль ачкычы тапшырды.
Күп балалы аналарның берсе Марина Люлина бүләкләнгән аналар исеменнән Татарстан Президентына рәхмәт белдерде.
«Сез – безнең гаиләләргә чын үрнәк, - дип мөрәҗәгать итте Рөстәм Миңнеханов бүгенге тантанада катнашучыларга. – Без сезнең бәхетле кешеләр булуыгызны күрәбез, һәм бу бәхет сезнең белән гомерегез буе булачак».