Республика бюджетына үзгәрешләр кертелде

Республиканың 2015 елгы бюджетына үзгәрешләр кертү турындагы закон проектын Дәүләт Советы депутатлары беренче укылышта карап тикшерделәр. Документны ТР Финанс министры Радик Гайззатуллин тәкъдим итте.

Парламентка республика хөкүмәте тарафыннан кертелгән закон проектын тәкъдим итеп, министр аның төп асылын аңлатты. Татарстанның 2015 елга тышкы бурычы күләмен арттырырга һәм ТР хөкүмәтенә әлеге бурыч күләме буенча гарантияләрне арттыру хокукы бирергә тәкъдим ителә. Шул ук вакытта бюджет кытлыгын финанслау чыганакларына тиешле үзгәрешләр кертелергә тиеш.

Закон проекты 2005 елда “Связьинвестнефтехим” компаниясенә кергән “Синек Кэпитал С.А.” ширкәте алган бурычлар буенча дәүләт гарантиясе күләмен 8,8 млрд сумга арттырырга тәкъдим ителә. Әлеге ярдәм Россия рубле курсы кискен төшү аркасында компаниянең бурычларын ашыгыч рәвештә түләргә туры килмәсен өчен күрсәтелә.

Закон проектын тикшерүдә депутатлар Хафиз Миргалимов, Артем Прокофьев һәм Александр Комисаров катнаштылар.

Бюджет, салымнар һәм финанс комитеты рәисе Леонид Якунин закон проектын яклап чыгыш ясады һәм аны өченче укылышта ук кабул итәргә дигән тәкъдим кертте.

Дәүләт Советы закон проектын тулаем кабул итте.