ТР Премьер-министры Илдар Халиков: Татарстан Республикасы социаль-икътисади үсешендә тискәре тенденцияләр күзәте

2015 елның гыйнварында Татарстанның тулай төбәк продукты бәяләү буенча 0,1% ка кимегән. Гыйнвар-февральдә республикада сәнәгать җитештерүе индексы 99,3% тәшкил иткән, авыл хуҗалыгы продукциясен җитештерү 1,4 % ка арткан, ваклап сату сәүдә әйләнеше 15% ка кимегән. Мондый саннарны бүген Татарстан Республикасы Премьер-министры Илдар Халиков бишенче чакырылыш Татарстан Республикасы Дәүләт Советының алтынчы утырышында хәбәр итте.

“Агымдагы елда Татарстан Республикасының социаль-икътисади үсешендә тискәре тенденцияләр күзәтелә”, - диде ул, ТР Дәүләт Советы утырышында докладын башлап.
Илдар Халиков, аерым алганда, 2014 ел нәтиҗәләре буенча тулай төбәк продукты үсеш темплары узган ел белән чагыштырганда 101,3% тәшкил итте, дип искә алды. Гомумән тулай төбәк продуктының күләме 1 трлн. 631,4 млрд. сум тәшкил иткән. Сәнәгать җитештерүенең индексы 2014 елда 100,6 % тәшкил иткән.

ТР Хөкүмәте хисабында билгеләнгәнчә, Татарстан төп макроикътисади күрсәткечләр буенча гадәттәгечә Россия Федерациясенең алдынгы төбәкләре рәтенә керә. Тулай төбәк продукты күләме буенча республика 7 урында, авыл хуҗалыгы җитештерү күләме буенча - 3, сәнәгать җитештерүе күләме һәм төп капиталга инвестицияләр буенча - 5, төзелеш буенча - 6, торак йортларны файдалануга тапшыру һәм ваклап сату буенча 8 урында.