Илдар Халиков һәм Алексей Миллер Чаллыда газ-мотор ягулыгы базарының үсеш перспективалары хакында фикер алыштылар

Бүген Татарстан Республикасы Премьер-министры Илдар Халиков Чаллыда “КАМАЗ” заводы территориясендә узган “РФ газ-мотор ягулыгы базары үсеше буенча эшләрнең барышы турында. Табигый газда эшләүче автомобиль транспорты сегментын киңәйтү” киңәшмәсендә катнашты. Шулай ук бу чарада “Газпром” ААҖ идарәсе рәисе Алексей Миллер, “КАМАЗ” ААҖ генераль директоры Сергей Когогин, “Газпром трансгаз Казань” ҖЧҖ генераль директоры Рәфкать Катюков катнашты.

Илдар Халиков билгеләгәнчә, 2013 елдан Татарстан “Газпром газомоторное топливо” компаниясе белән тыгыз хезмәттәшлек итә.
“КАМАЗ” һәрвакыт газ-мотор ягулыгын гамәлгә кертү процессында актив катнашты. “РариТЭК” компаниясе белән бергә шундый двигательләр белән берничә йөз автомобиль төзелде. Бу экология һәм икътисади яктан файдалы”, - дип белдерде Премьер-министр.

“Газпром газомоторное топливо” компаниясе белән бергә Татарстан Хөкүмәте мотор ягулыгы сыйфатында сыекландырылган табигый газны гамәлгә кертү буенча эшләр алып бара.

Киңәшмәдә катнашучыларны сәламләп, Татарстан газ-мотор ягулыгы базарын үстерү буенча Россиядә алдынгылардан санала, ә “КАМАЗ” заводы үз чиратында газда эшләүче автомобильләр җитештерү буенча илдә беренче урынны алып тора, дип белдерде Алексей Миллер.

Алга таба киңәшмәдә катнашучылар газ-мотор ягулыгы базарының үсеш перспективалары хакында фикер алыштылар.

Бу чара тәмамланганда Сергей Когогин һәм Алексей Миллер үзара хезмәттәшлек турында Килешүне имзаладылар.