Рөстәм Миңнеханов: Бурятия Республикасының үсешкә мөмкинлекләре гаять зур

Бурятия Республикасының үсешкә мөмкинлекләре гаять зур. Бу хакта Татарстан Республикасы Президенты вазыйфаларын вакытлыча башкаручы Рөстәм Миңнеханов Бурятия башлыгы Вячеслав Ноговицин белән очрашуда белдерде. Чарада шулай ук  ТР Президенты Аппараты җитәкчесе Әсгать Сәфәров, ТР сәнәгать һәм сәүдә министры урынбасары Рашат Фәттахов, ТР Президентының Тышкы багланышлар департаменты директоры урынбасары Марат Гатин, Бурятия Республикасы министрлык һәм ведомстволары вәкилләре катнашты.

Вячеслав Наговицинга кабул иткәне өчен рәхмәт белдереп, Рөстәм Миңнеханов Бурятиянең илдәге иң бай төбәкләрнең берсе булуын билгеләп үтте. "Бу республиканың үсешкә мөмкинлекләре гаять зур: туристлык, минерал-чимал, кешеләр потенциалы бар. Мөгаен, әлегә ул тулысынча ачылмагандыр. Гаять зур территория һәм зур ресурслар дөрес үзләштерүне таләп итә. Сезнең системалы эш итүегез регионны яңа дәрәҗәгә чыгарыр дип уйлыйм", - дип ассызыклады ТР Президенты вазыйфаларын вакытлыча башкаручы.

Ул өстәп әйткәнчә, Бурятиядә булган кыска гына вакыт эчендә бик күп гаҗәеп нәрсәләр күргән, шул исәптән Байкал күлен дә.

Бүгенге көндә ике республика арасында гомуми товар әйләнеше күләме чагыштырмача зур түгел, дип билгеләде Рөстәм Миңнеханов. "Безнең продукцияне - сезнең регионда, ә сезнекен Татарстанда этәрүне тәэмин итәргә кирәк. Безнең продукциягә дөнья базарында ихтыяҗ зур булуын билеләп үтәсем килә. Сүз химия сәнәгате, машина төзелеше, нефть сәнәгате, шина җитештерү һәм башкалар турында бара", - диде ТР Президенты вазыйфаларын вакытлыча башкаручы. Бурятиядән Татарстанга агач продукциясен китереп була, дип тәкъдим итте Рөстәм Миңнеханов.

Ул ассызыклаганча, ике регион арасында элемтәләр системалы булырга тиеш. Моннан тыш, мәдәни багланышны тәэмин итү өчен дә шартлар булдырырга кирәк.

Бурятия Республикасы башлыгы, үз чиратында, Рөстәм Миңнехановка визиты өчен рәхмәт белдерде һәм, Татарстан белән дуслык Бурятиягә күп мәсьәләләр буенча шактый алга китәргә ярдәм итүен ассызыклады.

Аннары Рөстәм Миңнеханов белән Вячеслав Наговицин Татарстан Республикасы белән Бурятия Республикасы арасында сәүдә-икътисадый, фәнни-техник һәм социаль-мәдәни хезмәттәшлек турында килешүне гамәлгә ашыру буенча чаралар Планын имзалады.

Рөстәм Миңнеханов әлеге документ турында җентекләбрәк төбәк массакүләм мәгълүмат чаралары вәкилләре белән аралашкан вакытта сөйләде. "Һәр регион тормышның төрле өлкәләрендә эшләнмәләре бар. Медицина, энергетика, туризм, мәгариф һәм башка өлкәләрдә. Тәҗрибә белән алышыну зарури эш. Әлеге беркетмәдә шулар барысы да язылган: билгеле юнәлешләр, сроклар, җәлеп ителгән затлар буенча. Тиздән уртак эшнең беренче нәтиҗәләрен күрербез, дип өметләнәм", - диде ул.