Рөстәм Миңнеханов: Татарстан газ-мотор ягулыгы базарын үстерү буенча системалы чараларны эзлекле рәвештә гамәлгә ашыра

Татарстан федераль тармак министрлыклары һәм «Газпром» ААҖ ярдәме белән газ-мотор ягулыгы базарын үстерү буенча системалы чараларны эзлекле рәвештә гамәлгә ашыра. Бүген бу хакта Татарстан Республикасы Президенты вазыйфаларын вакытлыча башкаручы Рөстәм Миңнеханов Идел буе федераль округында (ИФО) газ-мотор ягулыгы базарын үстерү мәсьәләләре буенча киңәшмәдә хәбәр итте. Чара Чаллы шәһәрендә «КАМАЗ» ААҖ генераль дирекциясендә узды. Киңәшмә эшендә шулай ук Россия Федерациясе Президентының Идел буе федераль округындагы Тулы вәкаләтле вәкиле Михаил Бабич, Россия Федерациясе Сәүдә һәм сәнәгать министры Денис Мантуров, Россия Федерациясе Энергетика министры Александр Новак, Россия Федерациясе Транспорт министры Максим Соколов, ИФО субъектлары җитәкчеләре катнашты.

Киңәшмәдә катнашучыларны сәламләп, Рөстәм Миңнеханов белдергәнчә, Татарстан 2013 елдан башлап «Газпром» ААҖ белән бергәләп системалы рәвештә һәм озак сроклы нигездә газ-мотор ягулыгы базарын үстерә. Республика Хөкүмәте, «Газпром» ААҖ һәм «Газпром газомоторное топливо» ҖЧҖ арасында мотор ягулыгы сыйфатында табигый газ куллануны киңәйтү турында килешү төзелгән иде. «Без 2013-2023 елларда Татарстанда газ-мотор ягулыгы базарын үстерү буенча дәүләт программасы кабул иттек. Газ-мотор техникасын сатып алуларга субсидияләр бирү буенча гамәлгә ашырылучы федераль программалар һәм 2013-2015 елларда ТКХ, авыл хуҗалыгы һәм пассажирлар йөртү тармакларына республика бюджетыннан финанслашу нәтиҗәсендә республикада 643 берәмлек техника сатып алынган. 2012-2014 елларда субсидияләрнең гомуми суммасы 1,8 млрд. сумнан артып китте», - диде Татарстан Республикасы Президенты вазыйфаларын вакытлыча башкаручы.

Ул хәбәр иткәнчә, агымдагы елда 338 берәмлек газ техникасына заявка бирелгән. Бүген республикада 2900 берәмлек транспорт газ-мотор ягулыгында эшли.

Казанда «Газпром» ААҖ филиалы – «Газпром газомоторное топливо» ҖЧҖ үз эшчәнлеген уңышлы алып бара, диде Рөстәм Миңнеханов. Агымдагы елда өч яңа АГНКС (Түбән Кама, Зеленодольск һәм Бөгелмә) эксплуатациягә тапшырылачак. Шулай ук Чаллыдагы станцияне реконструкцияләү тәмаланып килә. Татарстан Республикасы Президенты вазыйфаларын вакытлыча башкаручы белдергәнчә, республикадагы 10 АГНКС Татарстанның барлык территориясендә газ-мотор техникасы маршрутларын даимиләштерергә ярдәм итә.

Рөстәм Миңнеханов газ-мотор ягулыгын гамәлгә ашыруны арттыруның нәтиҗәле инструменты итеп АЗС территориясендә компримирланган табигый газ блокларын урнаштыруны атады. 2016 елга республикада 16 шундый блок кую планлаштырыла.

«Безнең бурыч –2023 елга 50% җәмәгать транспорты паркын, 30% коммуналь техниканы, 30% төзелеш техникасын газ-мотор ягулыгына күчерү. Авыл хуҗалыгы бик зур резерв булып тора. «КАМАЗ»да газ-мотор ягулыгына көйләнгән йөк автомобильләре җитештерү башланды. Монда ел саен 8 мең берәмлек техника эшләнәчәк», - диде ул.

Шулай ук Рөстәм Миңнеханов билгеләп үткәнчә, бүген 60% газ двигательле техника сатып алучылар төп сәбәп итеп экономиялелекне атыйлар.