Илдар Халиков Кытай гражданнар инженер-төзелеш корпорациясе вәкилләре белән очрашты

Кытай гражданнар инженер-төзелеш корпорациясе (China Civil Enginееring Construction Corporation – ССЕСС) Татарстан Республикасы белән юллар төзелеше белән бәйле кайбер проектларны, шул исәптән "Европа - Көнбатыш Кытай" транспорт магистрале проектын гамәлгә кертүдә хезмәттәшлек итү теләге булуын белдерде.
Бу хакта бүген Татарстан Республикасы Премьер-министры Илдар Халиковның Кытай гражданлык инженер-төзелеш корпорациясе җитәкчелеге вәкилләре белән очрашуында сөйләшенде.

Илдар Халиков Кытай партнерлары тарафыннан Татарстан Республикасына игътибар һәм кызыксыну өчен рәхмәт белдерде. Ул шулай ук соңгы вакытта республикада Кытай компанияләре катнашында күп проектлар гамәлгә кертелә, дип билгеләде. Аерым алганда, бу "Мастер" Кама индустриаль паркы мәйданчыгында Кытайның суыткыч җиһазлары һәм көнкүреш техникасы җитештерү буенча “Хайер” (Haier) компаниясе проекты.

Кытай гражданнар инженер-төзелеш корпорациясе вәкилләре компания һәм аның бүген дөньяда һәм Россия Федерациясе территориясендә гамәлгә кертелә торган төп проектлары хакында кыскача сөйләделәр. Без Татарстанның Россиядә иң алдынгы төбәкләрнең берсе булуын беләбез һәм аның белән хезмәттәшлек итәргә телибез, шул исәптән, "Европа - Көнбатыш Кытай" транспорт магистрале проектын гамәлгә кертү дә, диде Кытай партнерлары.

Очрашуда шулай ук Проектларны финанслау федераль үзәге белгечләре дә катнашты. 2015 елның 5 августында Россия Федерациясендә Кытай гражданнар инженер-төзелеш корпорациясе вәкиллеге һәм "Кытай гражданнар инженер-төзелеш корпорациясе" ҖЧҖ арасында хезмәттәшлек турында килешү төзелгән иде. Документ Россия белән Кытай арасында инфраструктура төзелеше өлкәсендә, шул исәптән "Европа - Көнбатыш Кытай" халыкара транспорт маршруты төзелешендә нәтиҗәле кооперация урнаштыру максаты белән имзаланды.

ТР Инвестицион үсеш агентлыгы җитәкчесе Талия Миңнуллина очрашу барышында Кытай гражданнар инженер-төзелеш корпорациясе вәкилләренең Татарстан Республикасына беренче килүләрен, ТР Инвестицион үсеш агентлыгында эшлекле очрашулар узуын, хезмәттәшлек мәсьәләләре турында фикер алышулар булуын хәбәр итте.