Татарстан Президенты БГӘнең эшлекле даирәләре белән очрашты
Бүген Татарстан Республикасы Президенты Рөстәм Миңнеханов Дубай шәһәренә эш сәфәре кысаларында Берләшкән Гарәп Әмирлекләре эшлекле даирәләре белән очрашты.
Рөстәм Миңнеханов Россия-Әмирлекләр мөнәсәбәтләре кысаларында Татарстан белән БГӘ арасындагы сәүдә-икътисадый хезмәттәшлек перспективаларын югары бәяләде.
«Татарстан – Россиянең икътисадый үсеш алган, тотрыклы һәм инновацион төбәкләреннән берсе. Без Россия Федерациясе субъектлары арасында күп кенә социаль-икътисадый күрсәткечләр һәм инвестицион климат буенча алдынгы урыннарда барабыз», - диде Татарстан Республикасы Президенты.
Очрашу кысаларында яклар киләчәк хезмәттәшлек юлларын билгеләделәр. Аерым алганда, төзелеш бизнесы, күчемсез мөлкәт белән эшләү, туризм һәм мәдәни-күңел ачу инфраструктурасын үстерү юнәлешләре буенча потенциал билгеләп үтелде.