ЯҢАЛЫКЛАР

Бүген Татарстан Республикасы Хөкүмәте Йортында Татарстан Республикасы Президенты Рөстәм Миңнеханов рәислегендә В.Д. Шашин ис. «Татнефть» ГАҖ Директорлар советының чираттагы утырышы узды. Утырышта катнашучылар агымдагы елның 9 аенда «Татнефть» ГАҖ бюджеты үтәлеше нәтиҗәләрен карадылар һәм 2020 елның ноябренә бюджетын расладылар.

Бүген Татарстан Республикасы Президенты Рөстәм Миңнеханов Татарстан кече нефть компанияләре җитәкчеләре белән киңәшмә үткәрде. Катнашучылар кече нефть компанияләренең агымдагы елның 9 аенда эшенә йомгак ясадылар һәм ел азагына кадәр бурычларын билгеләделәр. Чара Татарстан Республикасы Хөкүмәте Йортында узды.

Россия Федерациясе финанслар министры Антон Германович Силуанов Хөкүмәт һәм Дәүләт Думасы вәкилләре белән алдагы өч елга бюджет проекты турында фикер алышты. Сезнең игътибарыгызга РФ финанслар министры чыгышын тәкъдим итәбез.

24 октябрьдә «Бөтенроссия финанс белеме атналыгы» башланды. Өлкәннәр дә, балалар да шәхси финансларга җаваплы һәм акыл белән карарга өйрәнә алачаклар.

2021 елга һәм 2022-2023 елларның планлы чорына республика бюджеты турындагы закон проекты профильле юнәлешләр буенча парламент комитетларында карау процедурасын узды һәм беренче укылышта кабул итү өчен тәкъдим ителде. Бүген Бюджет, салымнар һәм финанс комитеты утырышында закон проекты буенча җыелма бәяләмә кабул ителде, анда Дәүләт Советының барлык комитетларының тәкъдимнәре һәм искәрмәләре исәпкә алынды. Моннан тыш, парламентарийлар федераль бюджеттан Татарстан Республикасы бюджетына бюджет кредитлары бирү турындагы килешүләргә өстәмә килешүләр, шулай ук кайбер федераль закон проектлары турында фикер алышты.

Өстәмә табышка салымны 15%ка арттыра торган керемнәр исемлеге парламент һәм төбәкләр белән фикер алышу нәтиҗәләре буенча төгәлләштерелде. Закон проектының төп принцибы - кешеләрнең хезмәт эшчәнлегенә бәйле булмаган (хезмәт хакын һәм дивидендларны да кертеп) 5 млн сумнан артык даими һәм актив керемнәргә НДФЛның арттырылган ставкасын куллану һәм даими булмаган керемнәрне исәпләү базасыннан чыгару. Гражданнарның теләсә кайсы шәхси мөлкәтен сатудан (кыйммәтле кәгазьләрдән тыш) һәм иминият түләүләренә югары ставканы арттырмаска тәкъдим ителә. Закон проектының икенче укылышына тиешле төзәтмәләр РФ Хөкүмәтенә кертелде.

Законлылык һәм хокук тәртибе комитетының 20 октябрьдә узган утырышында депутатлар "2021 елга һәм 2022 һәм 2023 еллар чорына ТР бюджеты турында" закон проектын, берничә федераль закон проектын карап тикшерделәр, җәмәгать судьялары итеп сайлауга тәкъдим ителгән кандидатураларны хупладылар.

Бүген Экология, табигатьтән файдалану, агросәнәгать һәм азык-төлек сәясәте комитеты утырышында атмосфера һавасын саклау өлкәсендәге законнарны үтәү мәсьәләләре турында фикер алыштылар. Моннан тыш, парламентарийлар 2021 елга һәм 2022 һәм 2023 елларның планлы чорына бюджет турында закон проектын, авыл хуҗалыгы билгеләнешендәге җирләрнең уңдырышлылыгы, җир асты байлыклары турында республика законнарына һәм республиканың Экология кодексына үзгәрешләр кертү хакында закон проектын карады. Комитет утырышында Дәүләт Советы Рәисе урынбасары Марат Әхмәтов катнашты.

Бүген Икътисад, инвестицияләр һәм эшкуарлык комитеты утырышы булды, анда парламентарийлар «2021 елга, 2022 һәм 2023 елларның планлы чорына Татарстан Республикасы бюджеты турында» Татарстан Республикасы законы проекты буенча фикер алыштылар. Утырыш эшендә Дәүләт Советы Рәисе урынбасары Марат Әхмәтов катнашты.

Комитет әгъзалары республиканың 2021 - 2023 елларга социаль-икътисадый үсеш фаразын һәм «2021 елга, 2022 һәм 2023 елларның план чорына Татарстан Республикасы бюджеты турында» Татарстан Республикасы законы проектын тыңладылар, аны Татарстан Республикасы Премьер-министры урынбасары - Татарстан Республикасы Икътисад министры Мидхәт Шаһиәхмәтов һәм Татарстан Республикасы Финанслар министры урынбасары Алла Анфимова тәкъдим итте.

Бүген Дәүләт Советында Дәүләт корылышы һәм җирле үзидарә комитеты утырышы узды, анда парламентарийлар 2021 елга һәм 2022-2023 елларның планлы чорына республика бюджеты параметрлары турында фикер алыштылар, шулай ук кайбер закон проектларын карадылар. Утырышны Дәүләт корылышы һәм җирле үзидарә комитеты рәисе Альберт Хәбибуллин уздырды, фикер алышуда Дәүләт Советы Рәисе урынбасары Марат Әхмәтов, Дәүләт Советы Секретаре Лилия Маврина катнашты.