9 айда Татарстанда 1,77 млн. квадрат метр торак төзелгән

Бүген Татарстан Хөкүмәте йортында торак төзелеше, шул исәптән, социаль ипотека программасы буенча торакны гамәлгә кертү, Бөек Ватан сугышы ветераннарын торак белән тәэмин итү, 2011 елда гражданнарны авария хәлендәге торак фондтан күчерү буенча республика программасын гамәлгә ашыру мәсьәләләре буенча республика киңәшмәсе узды. Аны Татарстан Президенты Рөстәм Миңнеханов алып барды.
Көн үзәгенә куелган мәсьәләләр буенча ТР Министрлар Кабинетының төзелеш, транспорт, торак-коммуналь һәм юл хуҗалыгы идарәсе башлыгы Илдар Сибгатуллин һәм ТР Төзелеш, архитектура һәм ТКХ министры Ирек Фәйзуллин хисап тотты.
Киңәшмәнең башында ук Рөстәм Миңнеханов агымдагы елга билгеләнгән төп төзелеш эшләрен төгәлләргә вакыт җиткәнен искәртеп узды. Тулаем алганда, куелган план күрсәткечләре үтәлеп килсә дә, Яшел Үзән һәм Казан буенча төзелешкә акча җыю буенча берникадәр артта калу сизелә, моңа бәйле рәвештә, аларга шушы көннәрдә барлык төзелеш программалары буенча акча күчерү буенча бурычларны үтәргә кушылды. Президент үз чиратында аларның биргән вәгъдәләренә ышанычын белдерде.
2011 елның 9 ае эчендә 1 миллион 767 мең квадрат метр торак кертелгән (план 1 млн. 600 мең квадрат булган), шулай итеп, еллык планның 74 процент өлеше инде үтәлгән. Торак кертү буенча еллык планны 14 муниципаль берәмлек тулысынча үтәүгә ирешкән: алар Әгерҗе, Аксубай, Әлки, Апас, Буа, Югары Ослан, Биектау, Зәй, Кайбыч, Лаеш, Балык Бистәсе, Сарман, Тәтеш, Тукай районнары. 23 муниципаль берәмлектә еллык план 75 процент дәрәҗәсендә үтәлгән. Актаныш, Алексеевски, Питрәч, Саба, Теләче, Ютазы муниципаль районнарында еллык план үтәлеше 90 процентны тәшкил итә.
2011 ел азагына кадәр 623 мең квадрат метр торакны файдалануга тапшыру зарур, шул исәптән, социаль ипотека программасы буенча 160 квадрат метр, шәхси торак 219 мең квадрат метр һәм инвестицияле торак 244 мең квадрат метр мәйданнан гыйбарәт.
Илдар Сибгатуллин билгеләп узганча, Түбән Кама һәм Кама Тамагында да торак төзелеше һәм аны файдалануга тапшыру буенча кайбер тоткарлыклар килеп чыккан. Дөрес Кама Тамагында ноябрьдә 37 фатирлы торак йортны куллануга тапшыру планлаштырыла. “Анда подрядчы көчәйде көчәюен, әмма 10 нчы октябрьгә кадәр эшләрен тәмамлавы бик икеле, 14 нче ноябрьгә кадәр бу йорт буенча төзелеш эшләренә нокта куелырга тиеш”, - дип чыгыш ясады Илдар Сибгатуллин.
“Торак кертү буенча позицияләрнең нинди булуы сезгә мәгълүм, мин сезне кисәттем”, - дип белдерде Рөстәм Миңнеханов идарә башлыгының докладына бәя биреп.