Рөстәм Миңнеханов: Казан заманча төргәкләү заводы кебек проектлар күп булырга тиеш

“Химград” технополисы территориясендә киләсе елның өченче кварталында тагын бер производство эшли башлаячак. Бүген биредә “Казан заманча төргәкләү заводы”ның нигез ташлары салынды. Әлеге тантана ТР Президенты Рөстәм Миңнеханов катнашында узды. Чарада шулай ук Премьер-министрның беренче урынбасары Равил Моратов, ТР Инвестицион үсеш агентлыгы генераль директоры Линар Якупов, РФ Икътисади үсеш министрлыгының Кече һәм урта эшмәкәрлекне үстерү департаменты директоры Наталья Ларионова, “Внешэкономбанк” дәүләт корпорациясе рәисе урынбасары Михаил Копейкин, “Эшлекле Россия” (“Деловая Россия”) иҗтимагый оешмасы президенты Александр Галушко һ.б. кунаклар катнашты.

Проект ТР җитәкчелеге, РФ Икътисади үсеш министрлыгы, ТР Инвестицион үсеш агентлыгы, “Химград”, технополисы катнашында гамәлгә ашырыла. “Казан заманча төргәкләү заводы” ҖЧҖ генераль директоры Искәндәр Әхмәтханов сүзләренә караганда, әлеге проектка 560 млн сумлык инвестицияләр салынган. Яңа производствоны сафка бастыру ике кызыклы технологияне берләштереп гамәлгә ашырыла. Беренчесе заводны төзү белән бәйле булса, икенчесе җиһазландыруга кагыла. Искәндәр Әхмәтханов белдергәнчә, биредә кулланылучы заманча технологияләр конструкцияләр ярдәмендә заводның корпусын 2-3 ай эчендә җыеп бетерергә мөмкинлек бирә. Бу эшне генераль подрядчы --“Татнефтепроводстрой” ААҖ бүлендек предприятиесе булган “Леннефтепроводстрой” җәмгыяте башкара. Ә продукция җитештерү өчен кирәкле технологик линия белән заводны Австриянең “Старлингер” (Starlinger ) компаниясе тәэмин итәчәк. Шушылардан чыгып караганда, әлегә Казан заводына Россиядә тиңнәр юк.

Заводның куәте елына 44 млн югары технологияле продукция - тартма тибындагы AD STAR полипропилен капчыклар эшләп чыгаруга исәпләнгән. Аны чимал белән тулысынча диярлек (95 процентка) Татарстанның нефть химиясе комплексы тәэмин итәчәк. Шул рәвешле, республикада чималдан әзер продукциягә кадәрге чылбырны эченә алган югары технологияле кластер формалашачак. Производство сафка басу 160 тан артык яңа эш урыны булдырырга ярдәм итәчәк. Искәндәр Әхмәтханов сүзләреннән аңлашылганча, 6-9 айдан завод тулы җитештерү куәтенә чыгарга тиеш. Аның продукциясе үзебезнең ил базарында чит илләрдә эшләнгән аналогларын алмаштырырга тиеш. Әлеге капчыклар азык, химия сәнәгатендә файдаланылачак. Ягъни, шикәр, он, төзелеш катнашмалары, ашламалар һ.б. төргәкләүдә кулланылачак. Продукциянең 30 проценты Татарстан базарына, калганы илнең башка төбәкләренә озатылачак.

ТР Президенты Рөстәм Миңнеханов үзенең чыгышында республикада мондый югары технологияле производство мәйданнарының күп булуын җиткереп, аларның тагын да күбрәк булырга тиешлеген искәртте. “Безнең төп стратегик бурыч – югары технологияле заманча продукция җитештерү күләмнәрен арттыру. 2016 елга тулай төбәк продукты күләмен 2 трлн сумга җиткерү бурычы куела, Татарстан өчен ул үтәрлек бурыч ”, -дип белдерде ул. Республика башлыгы Татарстанның соңгы 5-6 елда федераль программаларда актив катнашуын, казанышларның шактыеның әлеге программалар ярдәмендә ирешелүен ассызыклап, РФ Икътисади үсеш министрлыгына рәхмәт белдерде. Ул шулай ук барлык эре проектлар, кече һәм урта бизнес проектлары буенча Татарстанның эре стратегик партнеры булган “Вшнешэкономбанк” җитәкчелегенә рәхмәт белдерде.