Юллар фонды акчасы ишегаллары территорияләрен төзәтүгә тотылачак

Бердәй авыл хуҗалыгы салымыннан республика бюджетына күчерелергә тиешле салым керемнәре тулысынча муниципаль районнарның һәм шәһәр округларының бюджетларына күчерелә.

Республика бюджеты акчасының торак пунктларның күпфатирлы йортлары ишегалды территорияләрен, күпфатирлы йортларның ишегалды территорияләренә керү юлларын капиталь ремонтлауны һәм ремонтлауны финанс белән тәэмин итү максатларында тотылырга тиешле өлеше ТР Юллар фондына өстәмә рәвештә кертелгән.

Татарстан Республикасы Юллар фонды бюджет ассигнованиеләрен булдыру һәм куллану тәртибе региональ яисә муниципальара әһәмиятле гомуми файдаланудагы каты өслекле автомобиль юлларын проектлауга һәм төзүгә (реконструкцияләүгә), шулай ук гомуми файдаланудагы автомобиль юллары челтәре белән ел әйләнәсендә элемтәсе булмаган авыл торак пунктларына кадәр җирле әһәмиятле гомуми файдаланудагы каты өслекле автомобиль юлларын проектлауга һәм төзүгә (реконструкцияләүгә) җирле бюджетларга Татарстан Республикасы Юллар фонды бюджет ассигнованиеләренең гомуми күләменнән кимендә 5 процент күләмендә субсидияләр бирүгә бюджет ассигнованиеләрен юнәлдерүне күз алдында тотарга тиеш.

Аерым очракларда Юллар фондының бюджет ассигнованиеләре бюджет кредитлары буенча бурычларны түләүгә, шушы кредитлардан файдалану белән бәйле рәвештә бурыч йөкләмәләренә хезмәт күрсәтү чыгымнарын башкаруга (20 проценттан артмаган күләмдә), шулай ук җирле әһәмиятле гомуми файдаланудагы автомобиль юлларын төзүгә (реконструкцияләүгә), аларга капиталь ремонт ясауга, ремонт ясауга һәм аларны карап тотуга җирле бюджетларга бюджет кредитларын һәм субсидияләр бирүгә каралырга мөмкин.

Бюджет кодексы белән бюджет кытлыгына һәм бюджет кредитларын биргәндә дәүләт (муниципаль) бурычның чик күләменә кагылышлы билгеләнгән чикләрдән чыгу ихтималы булган вакыт 2017 елның 1 гыйнварына кадәр озайтылган.

Закон 2012 елның 1 гыйнварыннан үз көченә керә.