Татарстанда капиталь ремонт эшләре программага кергән 849 йортның 581ендә башланган

Татарстанда 581 күп фатирлы торак йортта капиталь ремонт буенча эшләр башланган инде. Бу хакта бүген ТР Хөкүмәт йорты видеоконференция режимында узган республика киңәшмәсендә белдерелде.

Татарстан Республикасында “Торак-коммуналь хуҗалыкны реформалаштыруга ярдәм итү фонды турындагы” РФ Законын һәм мәгариф объектларын капиталь ремонтлауны гамәлгә ашыру мәсьәләләренә багышланган чараны Татарстан Республика Президенты Рөстәм Миңнеханов үткәрде.

2012 елда күп фатирлы торак йортларны капиталь ремонтлау программасы буенча гомуми мәйданы 5,4 млн. кв. метрлы 849 күп фатирлы торак йортны ремонтлау планлаштырыла. 2012 елда финанслау 4 млрд. 356 млн. 587 мең сум тәшкил иткән. Капиталь ремонт үткәрү өчен 203 подрядчы оешма расланган.

Татарстан төзелеш, архитектура һәм торак-төзелеш министры Ирек Фәйзуллин белдергәнчә, йортларны капиталь ремонтлау программасында 418 мең кв.м. түбәне, 67 мең кв.м. подвалны, 1 млн. кв.м. фасадны ремонтлау, 64 гомумйорт хисап приборы урнаштыру, йорт эчендә 1 млн. метр инженер коммуникацияләрен ремонтлау каралган.

“Бүген программа буенча искәрмәләр районнарга җиткерелгән. Без кичә Торак-коммуналь хуҗалык фондына 2012 елда капиталь ремонт һәм аварияле торак буенча заявка тапшырдык”, - дип билгеләп үтте министр һәм программа 5 нче ел эшләүгә карамастан, муниципаль берәмлекләрдә шул ук җитешсезлекләр кала дип белдерде.

“1 майга кадәр барлык җитешсезлекләр дә хәл ителергә тиеш, бигрәк тә кадастр учеты буенча эшләрне хәл итү зарур. Без бу җитешсезлекләрне 30 апрельгә кадәр хәл итмәгән муниципаль берәмлекләрне финансламаска тәкдим итәбез”, - дип белдерде И.Фәйзуллин.

“Кешеләр җитәкчеләре башка эш белән мәшгуль булудан зыян күрергә тиеш түгел, - диде Рөстәм Миңнеханов. – Андый җитәкчеләргә шелтә белдерәчәкбез. Бу кешеләр язмышы. Бу башбаштаклык. Җаваплы кешеләр җәзасын алачак”.

Һәр муниципаль берәмлек җитәкчесе үз территориясен, районда яшәүчеләр мәнфәгатьләрен кайгыртырга тиеш, дип ассызыклады республика башлыгы.