Казанда АТЭС илләренең казначылык органнары семинары ачылды

Сентябрь башында Владивосток шәһәрендә Азия-Тын океан икътисади хезмәттәшлеге (АТЭС) илләре лидерлары саммиты узачак. Аның кысаларында планлаштырылган мөһим халыкара чараларның бер өлешен Казан да кабул итә. Шуларның берсе – АТЭС илләре казначылык системасын модернизацияләүгә багышланган семинар бүген “Костон”да ачылды. Чараны Федераль казначылык белән РФ Финанс министрлыгы Бөтендөнья банкы һәм АТЭС секретариаты булышлыгында оештырган. Федераль казначылык җитәкчесе Роман Артюхин рәислегендә узучы семинарда ТР Президенты вазифаларын башкаручы-Премьер-министр Илдар Халиков, Бөтендөнья банкы, Халыкара валюта фонды вәкилләре, АТЭС икътисади хезмәттәшллеге илләре – Малайзия, Тайвань, Вьетнам, Индонезия, Кытай, Таиланд, Сингапур, Бруней, Корея, Чили, Филиппин, Перуның казначылык органнары җитәкчеләре катнаша.
 Семинарда катнашучыларны иң элек Федераль казначылык җитәкчесе Роман Артюхин сәламләде. Семинарның рәисе буларак, ул кунакларга чараны кабул итүче Татарстан хакында мөһим мәгълүматларны җиткерде. Аерым алганда, аның Россиядәге эре икътисади, фәнни, мәгариф һәм мәдәни үзәкләрнең, илнең динамик үсештәге төбәкләренең берсе икәненә басым ясады. Мең елдан артык тарихы булган Казан каласының киләсе елда җәйге Универсиаданы, 2018 елда футбол буенча дөнья чемпионаты матчларын кабул итәргә җыенуын да искәртте. “Казан –Россиядә Исламның үзәге. Биредә яшәүче төрле милләт һәм дин вәкилләре арасында үзара хөрмәт, толерантлык булуны Казан Кремле территориясендә янәшә урнашкан мәчет белән собор да гәүдәләндерә. Юкка гына Казан ЮНЕСКО ның Бөтендөнья мәдәни мирасы исемлегенә кертелмәгән”, - дип искәртеп узды ул.
 Федераль казначылык җитәкчесе Россия җирлегендә бүгенгедәй мөһим халыкара чараны уздыруның гаять җаваплы икәнен белдереп, аның файдалы һәм кызыклы итеп узуы өчен барлык шартларның булуын искәртте.
 Быел Россия финанс министрлыгы 210 еллык юбилеен билгеләп үтәчәк. Бу вакыйганың Россиянең АТЭС илләре лидерлары саммитында рәислек итү елына туры килүе символик әһәмияткә ия, дип ассызыклый Роман Артюхин. Ул Россиядә казначылыкның роленә тукталып, аның 5 гасырдан артык тарихы булуын да искәртеп узды. Яңа Россия тарихында казначылык быел 20 еллыгын билгеләп үтәчәк. Федераль казначылык җитәкчесе ассызыклаганча, бүген Россиядә казначылык, АТЭС илләрендәге кебек үк, финанслар белән идарәдә дәүләт сәясәтен гамәлгә ашыруның мөһим инструменты санала.
 “АТЭС ның максаты – төбәкнең икътисади үсеше, чәчәк атуына булышлык итү, Азия-Тын океан төбәгенең хезмәттәшлеген ныгыту. Анда казанчылык системасын модернизацияләү проектның өстенлекле юнәлешләрнең берсе итеп куелуы куанычлы”, -ди ул.
 Роман Артюхин казначылык органнары җитәкчеләренең Казан җирлегендәге бу очрашуы АРЕС илләре финанс министрларының тиздән Мәскәүдә узачак очрашуына файдалы тәкъдимнәр әзерләргә ярдәм итәр, аларның аеруча әһәмиятлеләре, үсешнең башка мөһим юнәлешләре белән бергә, АТЭС илләре лидерларының Владивостокта узачак саммиты каравына чыгарылыр, дигән ышанычта кала. Ул казначылык органнары җитәкчеләренең бу очрашуын оештыруда булышлык иткән Татарстан җитәкчелегенә аерым рәхмәт белдерде. Федераль казначылык җитәкчесе мондый очрашуларның даими булырга тиешлеген искәртеп, чираттагысының бу елның ноябрендә Джакарта шәһәрендә узачагын хәбәр итте.
 АТЭС илләре вәкилләрен Татарстан Президенты, Дәүләт Советы, Хөкүмәте исеменнән сәламләгән Премьер-министр Илдар Халиков республиканың тотрыклы, көчле икътисадлы, сәнәгате, дәүләт идарәсе һәм мәгълүмат технологияләре актив үсештәге төбәк булуына игътибар юнәлтте. Хөкүмәт башлыгы республика икътисадының аеруча мөһим юнәлешләре арасыннан нефть һәм нефть химиясен, машина төзелешен, авиатөзелешне, суднолар, двигательләр җитештерүне һ.б. атады. Узган ел Татарстанда җитештерелгән тулай төбәк продукты күләменең 40 млрд доллардан артык булуына, республикада дөньякүләм танылу алган эре компанияләр эшләвенә, чит ил һәм Россия компанияләренә биредә бизнесын алып бару өчен уңайлы инфраструктура булдырылуына, республиканың 100 дән артык ил белән актив хезмәттәшлек итүенә басым ясады.
 Илдар Халиков Татарстанның мәгълүмат технологияләре өлкәсендәге уңышларын да бәян итте. Узган ел электрон формада 10 млн нан артык дәүләт хезмәте күрсәтелүгә, Хөкүмәтнең электрон документ әйләнеше системасында эшләвенә, бу өлкәдә Татарстанның ил күләмендәге тәҗрибә проектларында катнашуына тукталды. Аерым алганда, хәзер РФ Хөкүмәте белән берлектә “Электрон бюджет” дигән дәүләт интеграцияләнгән мәгълүмат системасын төзү концепциясе гамәлгә ашырылуын, Татарстанның бу проектта тәҗрибә төбәге буларак катнашуын да хәбәр итте.
 Илдар Халиков семинар эшлекле програмасы белән генә түгел, мәдәни чаралары белән дә катнашучыларнң исендә калыр дигән ышаныч белдерде. Соңыннан журналистлар белән булган әңгәмә вакытында ул бу очрашуның Татарстан өчен тәҗрибә өйрәнү ягыннан файдалы булуын ассызыклады. “Электрон бюджет” программасын гамәлгә ашыру буенча илдә лидер саналабыз. Шул ук вакытта бүгенге фикер алышулардан әле эшчәнлекне камилләштерергә, башка илләр тәҗрибәсен өйрәнү кирәк икәнен аңлыйбыз. Бу безнең өчен чит илләрдәге электрон финанслар өлкәсендәге тәҗрибә белән танышу ягыннан гаять әһәмиятле”, -дип искәртте ул.
 27 мартка кадәр дәвам итәчәк семинар “Казначылык системасын үстерүнең гомуми трендлары”, “Электрон бюджет”, “Ликвидлык белән идарә”дигән сессияләрне эченә ала.