ТР Президенты: “Татарстанда финанс, казначылык һәм салым системасы нәтиҗәле эшли”

Татарстанда финанс, казначылык һәм салым системасы нәтиҗәле эшли. Бу хакта бүген Татарстан Президенты Рөстәм Миңнеханов ТР финанс, казначылык һәм салым органнарының республика киңәшмәсенә нәтиҗә ясап белдерде.
Утырышта 2012 елның I кварталында Татарстанның консолидацияләнгән бюджеты үтәлеше нәтиҗәләре каралды. “Нәтиҗә уңай, җитди кисәтүләр юк”, - дип билгеләп үтте Татарстан башлыгы һәм бүген 2013-2015 елларга бюджет формалаштырыла, бу барлык министрлыклар, муниципалитетлар һәм финанс органнар өчен бик зур эш була дип өстәде.
ТР финанслар министры Радик Гайзатуллин белдергән консалидацияләнгән бюджет керемнәре күрсәткечләре I кварталда 46,5 млрд. сум булуы начар түгел дип саный Президент.
Республика башлыгы милек, физик затлар керемнәре, җир салымнарына, нефть продуктларына һәм алкоголь акцизларына да зур игътибар бирергә кирәк дип саный.
Рөстәм Миңнеханов бюджетка салым керемнәрен формалаштыруда кече һәм урта бизнесның ролен күтәрү зарур дип билгеләп үтте. “Бер яктан без гел ярдәм турында сөйлибез, икенче яктан, тулай төбәк продуктында кече бизнес өлеше – 25 процент, ә салым керемнәрендәге өлеше бары тик 4 процент кына”, - дип игътибарны юнәлтте ТР Президенты. Аның фикеренә караганда, бу мәсьәләгә муниципалитетлар игътибар бирергә тиеш. “Районнар кече бизнесның ни белән шөгыльләнүен аңларга тиеш. Кемдер салымнар түли, ә кемдер башка юллар эзли. Бу система ачык һәм гадел эшләргә тиеш”, - дип ассызыклады ул.
Бюджет үтәлеше процентларда һәм сумнарда түгел, ә сыйфатлы хезмәт күрсәтү һәм сыйфатлы төзелгән объектлар белән бәяләнергә тиеш, дип саный респубика башлыгы. Бүген төзелеш, аерым алганда, юл төзелеше буенча сораулар күп. “Бу башбаштаклыкны бетерергә вакыт. Төзүчеләр җаваплы булырга тиеш. Тауар җитешерүчеләрдән җыйган һәр тиен – алар дәүләт акчалары, аларны нәтиҗәле файдалану зарур. Хәзерге көндә капиталь ремонт, сәламәтлек саклау өлкәсен модернизацияләү, авыл, спорт белән бәйле проектларыбыз күп, алар файда китерергә тиеш”, - дип белдерде Татарстан Президенты.