Илдар Халиков: "ТР инвестицион-венчур фондына венчур проектларын арттырырга кирәк"

Венчур фондлары белән хезмәттәшлектә тормышка ашырыла торган венчур проектларының санын арттыру ТР ИВФ җитәкчелегенең төп бурычларының берсе булырга тиеш. Бу хакта бүген Татарстан Премьер-министры Илдар Халиков ТР Хөкүмәт Йортында узган “Татарстан Республикасының инвестицион-венчур фонды” ГНО попечительләр советы утырышында белдерде.
Илдар Халиков ТР ИВФ директоры Айнур Әйделдиновның фонд эшчәнлеге турында докладын шәрехләгәндә әлегә активларның бик үк югары булмаган керемле булуын билгеләде. Шул ук вакытта Татарстан Премьер-министры бу күрсәткечнең уңай динамикасына игътибар итте.
“Әлегә активларның күпчелеге инвестицион, венчурлы түгел, - дип искәртте Илдар Халиков. – Шулай булуга карамастан, фондның уңышсыз проектлары юк диярлек”.
“Төп теләгем – венчур фондлары белән хемәттәшлектә венчур проектларының өлешен арттыру, - дип белдерде Татарстан Хөкүмәте башлыгы. – Фондның партнерлары дөрес, ләкин аларның республикага акча китерүе кирәк”.
Шулай ук, ТР Премьер-министры фикеренчә, ТР ИВФ җитәкчелегенә нәтиҗәле булмаган кертемнәр белән тагын да уңышлы эшләргә өйрәнергә кирәк. “Бу - венчур бизнесы, мондый кертемнәр барыбер булачак, ләкин алар белән эшләргә өйрәнергә кирәк”, - дип саный Илдар Халиков.
Татарстан Республикасы территориясендә руда булмаган казылмаларны кулланып аз су таләп ителә торган цемент җитештерү инновацион проекты ТР ИВФ катнашачак перспектив венчур проектларының берсе булачак.
Бүген попечительләр советы вәкилләре проект авторларының чыгышын тыңлады һәм анда фондның катнашуын хуплады.

Утырыш вакытында попечительләр советы вәкилләре ТР ИВФның агымдагы эшчәнлегенә кагылышлы башка мәсьәләләрне дә карадылар.