Рөстәм Миңнеханов белән Николай Никифоров Чаллыда IT-парк ачтылар

Бүген Татарстан Президенты Рөстәм Миңнеханов Казан IT-паркының Яр Чаллыдагы икенче мәйданчыгын ачуда катнашты.

Чарада шулай ук РФ элемтә һәм гаммәви коммуникацияләр министры Н.Никифоров, вице-премьер - ТР мәгълүматлаштыру һәм элемтә министры Роман Шәйхетдинов, ТР мәгариф һәм фән министры Альберт Гыйльметдинов, Яр Чаллы мэры Васыйл Шәйхразиев, "КАМАЗ" ААҖ гендиректоры Сергей Когонин һ.б. катнашты.

Яр Чаллыда IТ-парк Казанның югары технологияләр технопаркының беренче филиалы булды. Бу проектка 1,38 миллиард сум инвестиция кертелгән. Ул федераль һәм республика бюджетыннан паритетлы башлангычларда финанслаштырылган.

Объект бик кыска вакыт эчендә төзелгән. Бу максатларда "КАМАЗ" ААҖнең төзелеп бетмәгән хисаплау үзәгенең каркасы файдаланылган, ул бер ел эчендә ультразаманча бинага әйләнгән, монда резидентларның эше өчен барлык шартлар тудырылган.

Чаллы IT-паркы - кече һәм урта IT-компанияләр өчен 10 мең кв. метрдан артык мәйданлы офис бүлмәләре. Бинаның гомуми мәйданы - якынча 23 мең кв.метр. Монда барлык кирәкле инфраструктура тудырылган: бизнес-инкубатор, сервер, сөйләшү бүлмәләре, конференц-зал һәм матбугат хезмәте, банк һәм почта бүлекләре, ашханә һ.б. Яхшы элемтә каналлары Чаллы мәйданчыгы белән Казаның төп технопаркы арасында тулы коммуникацияне тәэмин итә.

Тантаналы чарада чыгыш ясаганда, Николай Никифоров Яр Чаллы технопаркын "фантастик объект" дип атады.

"РФ җитәкчелеге тарафыннан бик амбициоз максат куелган - илдә 25 миллион югары технологияле эш урыны булдыру. Татарстанда икенче IT-паркны ачу технопарклар хәзинәсен тулыландыра. Бу төбәкнең әлеге максатка иң интенсив һәм зур адымнар белән баруы турында сөйли", - диде ул.

Федераль министр технопарк резидентларына үз бизнес-идеяләрен уңышлы алып баруларын теләде.

Чаллы IT-паркы мәйданчыгының үзенчәлеге - машина төзелеше өлкәсендәге IT- уйлап табуларга махсуслашан булуы. ТР Президенты билгеләвенчә, "КАМАЗ" технопарк хезмәтләрен төп кулланучы булачак. "Монда кече һәм урта бизнес үсшеннән тыш, бу IT-парк безнең эре компанияләргә эшләячәк", - диде Рөстәм Миңнеханов.

Чаллы мәйданчыгын эшләтеп җибәрү алдыннан Яр Чаллыда технопарк белгечләре тарафыннан тулы күләмдә IT-экосистема тудырылган, ул үз эченә кадрларны әзерләүне дә ала.

Казан (Идел буе) федераль университетының җирле филиалы базасында Югары информацион технологияләр һәм системалар мәктәбе филиалы ачылган.

IT-паркта студентларга Казаннан онлайн-лекцияләр укылачак, кайбер дисциплиналарны IT-парк резидентлары хезмәткәрләре укытачак. "Мин бу Россиянең һәм халыкара IT-үзәге булачак, дип уйлыйм", - дип ышанычын белдерде ТР Президенты.

Бүгенге көндә инде 22 компания Чаллы мәйданчыгының резиденты булган. 18 нче августта бизнес-инкубаторга беренче сайлап алу конкурсы үткән, анда РФнең 20 шәһәреннән 104 проект катнашкан.

Россия IT-тармагының авторитетлы вәкилләре кергән эксперт советы, алар фикеренчә, иң уңышлы 20 проектны сайлап алган. Бүген Рөстәм Миңнеханов һәм Николай Никифоров сайлап алу конкурсында җиңгәннәргә бизнес-инкубатор резентларының сертификатларын тапшырдылар.