2013 ел бюджетында социаль-мәдәни өлкәгә каралган чыгымнар күләме барлык чыгымнарның 68 процентын тәшкил итәчәк

Депутатларны бюджет проекты белән ТР Финанслар министры урынбасары Данил Волков таныштырды. Ул башта бюджетның керем өлешенә тәэсир ясый торган факторлар турында сөйләп үтте. Әлеге факторларның федераль законнарга кертелгән үзгәрешләр нигезендә килеп чыгуын белдерде. Билгеле булганча, РФ Салым кодексы буенча файдалы казылмаларга салым федераль үзәкнеке булып исәпләнә һәм 2012 елдан тулы күләмдә федераль бюджетка күчерелә.

2013 елга республика бюджетының керем өлеше - 128 328,2 млн. сум, чыгым өлеше – 130 938,6 млн. сум күләмендә карала. Кытлык 2 610,4 млн. сум күләмендә. Республиканың тупланма бюджетының керем өлеше - 160 199 990,3 млн сум, чыгым өлеше - 162 329 107,1 млн. сум, кытлык - 2 129 116,8 млн. сум.

Министр урынбасары билгеләп үткәнчә, тупланма бюджетның чыгым өлешен формалаштыруның нигезенә бюджетның социаль юнәлешен көчәйтүче принциплар салынган. Аерым алганда, бюджет өлкәсендә һәм идарә өлкәсендә эшләүче хезмәткәрләргә эш хакы 2013 елның 1 октябреннән 5,5 процентка артачак.

Шулай ук 2013 елның 1 сентябреннән стипендияләрне 5,5 процентка арттыру, коммуналь хезмәтләрне 12 процентка индексацияләү көтелә. 2013-2015 елларда республикакүләм социаль яктан әһәмиятле программаларны финанслау дәвам иттереләчәк.

Министр урынбасары сүзләренчә, бюджетның социаль юнәлешле булуы белем бирү стратегиясен тормышка ашыруны дәвам итү белән көчәйтеләчәк. Бу стратегияне тормышка ашыру өчен, 2013 елда республика бюджетында 2 млрд. сум акча каралган. Социаль-мәдәни өлкәгә каралган чыгымнарның күләме барлык чыгымнарның 68 процентын тәшкил итәчәк. Хезмәт хакын түләү өчен китә торган чыгымнар 40 процент тәшкил итәчәк.

Төрле өлкәләр буенча чыгымнарга килгәндә, “Милли икътисад” бүлегендәге “Транспорт” бүлекчәсенә - 2 693, 9 млн. сум, “Элемтә һәм информатика” бүлекчәсенә - 1 517,9 млн. сум, “Юл хуҗалыгы” бүлекчәсенә 11 260,3 млн. сум күләмендә акча каралган. “Торак-коммуналь хуҗалык” бүлегенә киләсе елда 3 386,6 млн. сум акча каралган.

Бюджет проекты турында фикер алышканда 2013 елда гамәлгә ашыруны тәмамлый торган республикакүләм программаларга һәм чараларны финанслауның 2014 елда кимүе турында да хәбәр ителде. Аерым алганда, 2013 елда “Татарстан Республикасында 2011-2013 елларда кече һәм урта эшкуарлык үсеше буенча республика программасы”, “Электрон Татарстан" озак вакытлы максатчан программасы тәмамлана. Шулай ук 2013 елгы Универсиаданы оештыру һәм уздыру өчен мәгълүмати-аралашу һәм телекоммуникация технологияләре өлкәсендәге чаралар төгәлләнә.

Утырышта ТР Икътисад министры Мидхәт Шаһиәхмәтов Татарстан Республикасының 2013 елга социаль-икътисади үсеш фаразы, төп финанс документының төп күрсәткечләре белән таныштырды.

Икътисад, инвестицияләр һәм эшкуарлык комитеты бюджет проектына карата үз тәкъдимнәрен дә яңгыратты.