Министрлар Кабинеты икътисадның тотрыклы үсеше өчен чаралар исемлеген раслады
РФ Хөкүмәте коронавирус таралу шартларында ил икътисадының тотрыклы үсеше өчен чаралар исемлеген раслады. Министрлар Кабинетының тиешле карары дүшәмбе көнне Хөкүмәт сайтында бастырылган.
Документ яңа коронавирус инфекциясе таралу сәбәпле хәлнең начарлануы шартларында аеруча зыян күргән эшчәнлек өлкәләрендә эшләүче оешмаларга һәм шәхси эшмәкәрләргә, аерым алганда, салым түләүләрен түләүгә бәйле кайбер ярдәм чараларын тәкъдим итә.
Документ нигезендә, кече һәм урта эшмәкәрләр (МСП) субъектлары реестрына кертелгән һәм коронавирустан аеруча зыян күргән эшчәнлек өлкәләрендә эшләүче оешмаларга һәм шәхси эшкуарларга оешмалар табышына салымны, бердәм авыл хуҗалыгы салымын, шулай ук 2019 елда салым салуның гадиләштерелгән системасын куллануга бәйле рәвештә алына торган салымны түләү срогы 6 айга озайтыла. Моннан тыш, шәхси эшкуарлар тарафыннан 2019 елда физик затларның керемнәренә салымны түләү срогы озайтыла.
Шулай ук РФ Хөкүмәте 2020 елның I кварталында өстәлгән бәягә салым буенча салым декларацияләрен һәм иминият кертемнәре буенча түләүләрне тапшыру срогын 2020 елның 15 маена кадәр озайта дип билгеләп үтелә. Моннан тыш, 2020 елның 31 маена кадәр күчмә салым тикшерүләрен уздыру турында карарлар чыгару туктатыла, диелә карарда.