Хакимият пандемиягә каршы көрәшкә һәм аның нәтиҗәләрен йомшартуга тулаем эчке продуктның якынча 2,8% юллаган

РФ хакимияте тарафыннан коронавирус таралуын тоткарлау һәм пандемия нәтиҗәләрен йомшарту өчен җибәрелгән ресурслар күләме тулаем эчке продуктның 2,8% ын тәшкил итәчәк, дип белдерде РФ Финанс министрлыгы башлыгы Антон Силуанов.

"Беренчедән, барлыкка килгән эпидемиологик хәлне исәпкә алып, хәзер көчләрне төп приоритетларда туплау таләп ителә - коронавирус таралуын тоткарлау һәм килеп туган тискәре нәтиҗәләрне йомшарту. Әлеге бурычларны хәл итүгә тулаем эчке продуктның 2,8%ына якын өстәмә финанс ресурслар юнәлтелгән", - диде Силуанов.

Халыкка, Россия икътисадының аерым тармакларына һәм эшчәнлек өлкәләренә фискаль ярдәмнең гомуми күләме тулаем эчке продуктның 6,5%тан артыграгы күләмендә бәяләнә. "Әйткәнемчә, халыкка һәм аерым тармакларга һәм эшчәнлек өлкәләренә ярдәм итү буенча моңарчы күрелмәгән чаралар каралган. Фискаль ярдәмнең гомуми күләмен тулаем эчке продуктның 6,5%тан артыгы күләмендә бәяләргә була", - дип билгеләде Силуанов.

"Моннан тыш, бу елга бюджет ассигнованиеләре күләме бюджет турындагы законда каралган чараларга карата җыелма бюджет язмасы аша 1 трлн сумнан артыкка арттырылачак - бу узган елларның тотылмый калган акчалары. Бюджет дисциплинасын көчәйтү чаралары, шулай ук килешүләрне оператив рәвештә төзү акчаларны алучыларга тоткарсыз җиткерүгә ярдәм итәчәк", - дип өстәде Финанс министрлыгы башлыгы.

"1 апрельдән кече һәм урта эшкуарлык субъектлары өчен иминият кертемнәре ставкасы ике тапкырга киметелгән - 30% тан 15% ка кадәр, ул хезмәткә түләүнең минималь күләменнән арткан хезмәт хакы суммасына кагылачак. 2020 елның 9 аенда гына да күрсәтелгән чаралар хисабына кече һәм урта эшкуарлык субъектлары өчен бушатыла торган средстволар күләме якынча 350 млрд сумга тәшкил итәчәк", - дип өстәде министр.

Силуанов сүзләренчә, РФдә коронавирустан зыян күргән тармаклардагы кече һәм урта компанияләргә түләүсез финанс ярдәм күләме 80 млрд сумнан артыгын тәшкил итәчәк. "Зыян күргән тармакларның кече һәм урта компанияләренә агымдагы бурычларны хәл итүгә, шул исәптән үз хезмәткәрләренең хезмәтенә түләү дәрәҗәсен саклап калуга турыдан-туры түләүсез финанс ярдәме (бер мәшгульгә 1 хезмәткә түләүнең минималь күләме) күрсәтеләчәк. Безнең бәяләүләр буенча, мондый программа 970 меңнән артык оешма һәм шәхси эшмәкәрләргә ярдәм итәчәк, финанс ярдәме күләме 80 млрд сумнан артыгын тәшкил итәчәк", - дип өстәде Силуанов.  

Шулай ук Финанс министрлыгы 2020 елда Россия икътисадына ярдәм итүгә Илкүләм иминлек фондыннан (ФНБ) 2 трлн сумга якын акча тотачак. "Быел Илкүләм иминлек фонды ресурсларын эшкә җигәчәкбез. Нефтькә агымдагы бәяләрдә - баррель өчен $20 - икътисадка якынча 2 трлн сум җибәрәбез", - диде Силуанов.

"Керемнәрнең мондый күләмле кимүенә карамастан, өстәмә ресурсларны җибәрү - икътисад өчен җитди ярдәм. Шул рәвешле, бюджет сәясәте контрциклик импульсны тәэмин итә", - дип билгеләде Финанс министрлыгы башлыгы.

Салымнарны һәм нефть-газ булмаган керемнәрне алып булмау куркынычы

Силуанов шулай ук Финанс министрлыгы салымнарны һәм бюджетның нефть-газ булмаган керемнәрен 1 трлн сумнан артык күләмдә алып булмау куркынычын күрә, дип хәбәр итте. "Салымнарны һәм бюджетның башка нефть-газ булмаган керемнәрен алып булмау куркынычы бар - без триллионнан артык күләм турында сөйлибез. Моны башка чыганаклар хисабына компенсацияләрбез", - дип билгеләде Силуанов.

Аның сүзләренчә, коронавирусның глобаль таралуы икътисадның барлык секторларында да диярлек (нефть-газ гына түгел) икътисади активлык дәрәҗәсенә тискәре йогынты ясый.