Рөстәм Миңнеханов Гайдар форумында катнашты

Бүген Мәскәүдә Татарстан Президенты Рөстәм Миңнеханов Гайдар форумының “Россия и мир” халыкара конференциясендә пленар фикер алышуда Россия төбәкләре глобаль базарларда көндәшлелек тәэмин итү өчен нәрсә эшли алуы хакында сөйләде.
Гайдар форумы — ул даими гамәлдә булган фикер алышу, икътисади һәм сәяси үсешкә йогынты ясаучы экспертлар очрашу урыны. Форум чараларында Россиядә һәм дөньяда глобаль процессларны аңлау буенча алымнар һәм төрле идеяләр буенча фикер алышалар. Быел 16-19 гыйнварга кадәр Гайдар форумы кысаларында “Россия и мир: вызовы интеграции” халыкара конференциясе уза, анда Россиянең глобаль сәүдәcе интеграциясе мәсьәләләре буенча фикерләшәләр.
Бу конференция Россиянең “Большая двадцатка”да рәислеге елында уза, дип билгеләп үтте РФ Дәүләт Думасы Рәисе Сергей Нарышкин бүген пленар фикер алышуны ачканда. Моннан тыш, бу Россиянең Бөтендөнья сәүдә оешмасына кергәч беренче Гайдар форумы. Дәүләт Думасы спикеры сүзләренә караганда, моның белән бәйле рәвештә форумның төп темасы – Россия икътисадының дөньяви киңлеккә интеграциясе.
Дискуссия модераторы Сергей Нарышкин Татарстан Президенты Рөстәм Миңнехановка “Россиянең аерым төбәгенең глобаль базарда нәтиҗәле позиция алуы мөмкинме?” дигән сорауга җавап бирергә тәкъдим итте.
“Бер генә төбәккә моны эшләү мөмкин түгел, шуңа күрә мин форумда Россиянең инновацион төбәкләре ассоциациясен тәкъдим итәм” , дип белдерде Рөстәм Миңнеханов.
Ул Россиянең инновацион төбәкләре ассоциациясе советы рәисе буларак, ассоциация эшчәнлеге турында сөйләде. Р.Миңнеханов белдергән мәгълүматларга караганда, 2012 елда ассоциация әгъзалары -12 төбәк тарафыннан 2 млрд. доллар чит ил инвестициясе җәлеп ителгән. Төбәкләрнең инновацияләргә киткән чыгымнары гомумроссия күрсәткеченең 26 процентын тәшкил итә.
Россиянең инновацион төбәкләре ассоциациясе әгъзаларының нефть химиясе, металлургия, авиакосмик сәнәгать тармакларында инновацион предприятиеләрнең уңышка ирешү мисаллары бар.

Рөстәм Миңнеханов Татарстанда дөньяви базарда көндәшлелеккә күтәрү өчен башкарыла торган эшләр турында сөйләде. Республика Президенты сүзләренә караганда, ТР да моның өчен предприятиеләр модернизацияләнә, хезмәт эшчәнлеген күтәрелә, яңа инновацион тармаклар булдырыла. Бүген Татарстан сәнәгать производствосы буенча Россиядә 5 урынны били, төп капиталга инвестицияләр буенча 4 нче. Төбәк Daimler, Ford, Rockwool, ZF һ.б. кебек танылган чит ил компанияләре тарафыннан инвестицияләр өчен сайлап алынган.
Рөстәм Миңнеханов фикеренә караганда, көндәшлелеккә сәләтлелекне тәэмин итү өчен предприятиләрне модернизацияләү зарур. Нефть химиясе өлкәсендә киң күләмле модернизацияләү эшләре алып барыла. Шулай итеп, “ТАНЕКО” төзелде, “ТАИФ-НК” дизель ягулыгы производствосын модернизацияләде, авыр калдыкларны эшкәртү комплексының яңа проектын булдырды. Минераль ашаламалар җитештерү буенча “Аммоний” заводы төзелә, “Түбән Кама Нефтехим” бер елга 1 млн. тонна этилен җитештерә алырлык комплекс төзелешенә керешә.
ТР Президенты сүзләренчә, көндәшлелеккә сәләтлелекне тәэмин итү эшендә хезмәт эшчәнлеген күтәрү икенче бурыч булып тора. “Предприятиеләр глобаль көндәшлелек шартларында аларның уңышка ирешүе нәтиҗәле эштән торуын аңларга тиеш”, - дип ассызыклады Рөстәм Миңнеханов.
“Россиянең Бөтендөнья сәүдә оешмасына керүе – безнең предприятиеләр өчен яңа чакыру, - дип билгеләп үтте ул. – Татарстан ярты сәнәгать продукциясен читкә чыгаручы төбәк буларак, предприятиеләр яңа шартларга тизрәк күнегү яклы”. Декабрьдә Татарстан делегациясе Бөтендөнья сәүдә оешмасы штаб-фатирында БСО кагыйдәләренә өйрәтүче семинарда булды.

Р.Миңнеханов сүзләренә караганда, тармакларны модернизацияләү белән бергә яңа тармаклар да үсеш ала. Шулай итеп, ТР да IT-компанияләрне үстерү өчен ике ИТ-парк булдырылды, Иннополис шәһәре төзелә. Тагын бер перспективалы юнәлешләрнең берсе – нанотехнологияләр. Татарстанда “Роснано” белән уртак проектлар гамәлгә куела, ноябрьдә Россиядә беренче наноүзәк ачылды.
ТР Президенты сүзләренчә, төбәкнең көндәшлелеккә сәләтле булуында кече һәм урта бизнесның үсеш алуы да мөһим.

Шулай ук Казанны Универсиадага әзерләү, инфраструктураны модернизацияләү дә көндәшлелеккә сәләтлелекне күтәрә һәм инвестицион җәлеп итүчәнлеккә ирештерә.

Анатолий Чубайс үз чиратында, Россиянең инновацион төбәкләре ассоциациясе әгъзалары - Татарстан һәм башка төбәкләрдән аермалы буларак, Россиядә ким дигәндә 10 субъектта инновацияләрне үстерү мөмкинлекләре бар, әмма аны эшләмиләр, дип белдерде.