Алабугада Ford компаниясенең двигательләр заводы төзелешенә старт бирелгән

Бүген “Алабуга” МИЗ территориясендә Ford Sollers компаниясенең двигательләр заводы төзелешенә старт бирелде. Тантанада ТР Премьер-министры Илдар Халиков, “Соллерс” ҖЧҖ генераль директоры Вадим Швецов, Ford Motor Company башкарма директоры Марк Филдс, Ford Sollers президенты Тед Каннис, Ford Sollers башкарма директоры Адиль Ширинов, ТР Алабуга районы башлыгы Геннадий Емельянов катнашты.

Производствоны эшләтеп җибәрү 2015 нче елга планлаштырылган. Тантана вакытында Илдар Халиков һәм Марк Филдс төймәгә басып, завод ачылышына кадәр булган вакытны санау таймерын эшләтеп җибәрделәр, аңа кадәр 931 көн калган. Заводның гомуми мәйданы - 42,6 мең кв.м.

Монда Ford Focus автомобильләренә куела торган 1,6 л күләмле Duratec двигательләре җитештереләчәк. Беренче этапта заводның еллык куәте 105 мең двигатель булыр, дип планлаштырыла, алга таба елына 200 меңгә кадәр арта ала.

“Яңа завод локальләштерүдә мөһим этап булачак. Аны төзи башлау безнең планнарның кызу темплар белән тормышка ашырылуын һәм Ford Sollers компаниясенең Россиядә автомобиль сәнәгатен үстерә торган мөһим уенчыларның берсенә әйләнүен аңлата”, - дип билгеләде Вадим Швецов.

Илдар Халиков ассызыклавынча, ул завод төзелеше буенча планнарның тормышка ашуына ышана.

Заводның уңышына һәм Россия автомобиль базары үсешенә Америка ягы да ышана. Марк Филдс, экспертлар бәяләвенчә, тиздән Россия автомобиль базары Германияне узып, Европада беренче номерлы базар булачак, дип сөйләде.

Заводта 500 эш урыны булачак.